Washington, Iaiong:
U heh ba dei khmih halor ka ioh- ka kot jong ka World Bank ha ka Sngi Balang, u la ong ba ka jingïakynad ha Middle East ka lah ban khynñiat da ki million ngut sha ka jingkyrduh katba ka jinghiar ka ïoh ka kot jong ka ka nang sawa shuh shuh ha kylleng ka pyrthei.
“Ngi don kumba 300 million ngut ki briew kiba mad ïa ka jingbym biang ka bam kaba jur mynta,” la ong u Indermit Gill. “Kata kan kiew kumba 20% stet bha, stet bha,” katba ki jingktah ki nang kiew.
U Gill u la kren ha shilynter jong ka jingialang jong ka tnat aiom jong ka International Monetary Fund bad ka Bank Pyrthei ha Washington.
Ka jingkhang ïa ka Strait of Hormuz, ka lynti ba kongsan ban pynpoi umphniang, ka la pynlong ïa ka dor jong ka sboh ban kiew bha namar ba ki shaniah ha ki marpoh khyndew.
Ka jingkiew dor jong ki sboh, kiba pyndonkam ha ka rep ka riang, ka lah ban pynlong ïa ki ri ban sangeh noh ïa ka jingshalan marbam shabar ri bad ban lum kham bun ki marbam na ka bynta jong ki, kaba pynkiew dor shuh shuh ïa ki marbam.
“Kita ki jingkhang shalan mar shabar ri ki pyntieng shibun ïa ngi,” la ong u Gill ha ki nongthoh khubor.
Kiba kham shah ktah ki dei ki briew ha ki ri kiba don ha ka thma ne kiba don ki sorkar kiba tlot.
Lada ym lah ban pynbeit kloi ïa ka jinglong jingman, “ka jingkyrduh kan sdang ban lynshop ïa kine ki ri da kaba jur.”
Mynta, ka jingduna jong ki marpoh khyndew bad ka jingktah jong ki ha ka ioh ka kot ka kham paw bha ha Asia, u Gill u la batai, hynrei “katba ka jingeh ka nang jrong, ka nang stet bha ban saphriang nyngkong sha Africa.”
