Turkey, Iaiong:
Katkum ki khubor, la ong ba uwei u khynah 13 snem, u la synreit kuli hapoh kawei ka skul kaba don ha Turkey ha ka Sngi Balang, ha kaba 9 ngut ki la khlad bad 13 ngut ki la mynsaw na katei ka jingjia ha katei ka sngi. Katba, kiba bun kiwei pat ki khynnah skul, ki la shu ïa kynthih bad rynsied kulmar nalor ki jingkhang-iit ban lait im na katei ka jingthombor jong utei u khynnah.
Katei ka jingjia ha ka Sngi Balang, ka la pynkhihwin bad pyn-par ñiangkhriat ïa ki nongshong shnong ka Kahramanmaras, kaba sha ka phang South jong kane ka ri, ha kaba, kum kine ki jingjia synreit kuli bad ki kam thombor ki long kiba kham ñiar ban shem.
U Myntri kam poh iing ka Turkey, u Mustafa Ciftci, ha ka jingpynbna ba la pyllait paidbah, u la pynpaw ïa ka jingsngewsih kaba jur halor ka jingduh noh ïa kitei ki mynsiem briew ba kordor bad kumjuh ruh ka jingsngewlem sha kito ki 13 ngut kiba ngat ha katei ka jingjia, ha kaba 6 ngut napdeng jong kitei kiba mynsaw, ki dei kiba don hapdeng ka jingsumar bad ba ka jingim jongki ka don ha thmier ka jingiap.
“Uwei u khynnah skul u la wan sha skul bad ki suloi kiba ngi ngeit ba ki dei ki jong u kpa jong u ha ka pla lyngkdong jong u. U la rung ha ki ar tylli ki kamra klas bad u la siat lyngkar, kaba la wanrah ïa ka jingmynsaw bad ka jingiap jong ki briew,” la ong u Mukerrem Unluer, Lat jong ka jylla Kahramanmaras, ha ki nongthoh khubor ha katei ka sngi.
Utei u nongthombor, uba dei u khynnah klas 8, u dei u khun jong uwei u ophisar pulit barim, ong u Unluer, da kaba bynrap ba utei u briew, u rah phra tylli ki suloi bad hynriew tylli ki magazine. U la khlad noh ha ka por ba jia katei ka jingjia.
“Ngi suba ba u lah ban shim ïa ki tiar jong u kpa jong u”, la ong u Lat.
“U la siat ialade. Ym pat lah ban tip la kane ka dei ka jingpyniap ialade ne ka la jia hapdeng ka jingkulmar,” u la ong.
Ki pulit ki la kem ïa u kpa jong utei u samla pule barim, U Ugur Mersinli, ong ka tnat pathai khubor ba thikna jong ka Anadolu.
katkum ki dur ba la pyllait paidbah da ka tnat pathai khubor shimet jong ka IHA la pyni ïa uwei u briew, ba la sop ïa ka met bad ka khmat, ba la pynkynriah noh da ka kali kit nongpang, kumjuh ruh ki kmie ki kpa kiba jaw ummat kiba la mareh sha katei ka skul ha ka nongbah bah jong ka jylla ba shatei lam mihngi, ka Kahramanmaras.
Kawei pat ka video, kaba la shim da u nongshong shnong jong kawei ka iing kaba don hajan, kaba la pynshisha da ka AFP, ka pyni ïa ki khynnah skul, kiba jngi na ka jingkhang jong ka mala kaba nyngkong jong katei ka skul, ban lait na ka jingshah siat, katba da ki phew ngut kiwei pat, ki phet krad lyngba ka phyllaw.
Ha katei ka video, lah ban iohsngew haduh 15 tylli ki kuli ha katei ka video kaba jrong shi minit shiteng.
Ki pulit ki la pynjur ïa ka jingpahara ha kylleng katei ka iing, bad ki dur telebishon ki la pyni ïa ki kali kit nongpang ha katei ka jaka.
Kane ka jingjia ka la pynlong ïa ki myntri kam poh iing bad ka pule puthi ban leit sha kane ka nongbah.
U myntri ka tnat aiñ, u Akin Gurlek, u la ong ba ki nongmudui ki la sdang ïa ka jingtohkit mardor halor kane ka jingshah siat.
