Port-au-Prince: ïaïong 14:
Hynriew ngut ki briew ki la shah kem ha kaba ïadei bad ka jingïakynad kaba la pynïap briew ha kawei ka jaka jngohkai pyrthei kaba pawnam ha Haiti, la ong ka tnat pulit jong ka ri. Katei ka jingjia, ka la jia ha ka Sngi Saitjain, ha ka por ba pynlong ïa ka jingrakhe ïa ka kolshor kaba man la u snem, ha Laferrière Citadel, kaba dei ka jaka ba la buh kyrpang da ka Unesco, kaba don ha ka thaiñ shatei Lam Mihngi jong ka Haiti.
Ki bor pyniaid ha kaba sdang ki la iathuh ba ki don 30 ngut kiba la shah pyniap hynrei kane ka jingkheiñ ka la kiew sha ka 25 ngut. Kiba la shah kem ki kynthup ïa phra ngut ki ophisar pulit trai ri bad arngut ki nongtrei jong ka National Heritage Preservation Institute (ISPAN) jong ka ri, kaba peit ïa ka jingpynneh pynsah ïa ki jaka ba kongsan jong ka Haiti. Mynta ki don ha phatok katba dang ap ïa ka jingpynshitom ain, la iathuh ki pulit.
La sdang ïa ka jingtohkit halor kaei kaba la jia hynrei u Myntri Rangbahduh ka ri, u Alix Didier Fils-Aimé, u la ong ha ka sngi saitjaiñ ba katei ka jingïakhih ka la jia “ha ka por ba don ka jingïalang jngohkai pyrthei kaba la ïashim bynta da kiba bun ki samla” ha katei ka jaka, ha ka nongbah Milot.
U la bynrap ruh ba lai sngi ka jingsngewlem jong ka ri halor kane ka jingjia, kan sdang naduh ka Sngi Ba-ar. U Mayor jong ka Milot, U Wesner Joseph, u la ïathuh ha ka radio station Magik9 ha ka sngi Nyngkong ba ka bor synshar jong u kam tip ïa kano kano ka kam kaba la thmu ban leh ha katei ka kut ha ka sngi Saitjaiñ, bad ba hadien ki la lap ba uwei u DJ trai shnong u la khot ïa ki briew sha katei ka jaka lyngba ka TikTok.
