Washington, Iaiong:
Ka United States ha ka Sngi Balang, ka la pynngat kyndon biang pyrshah ïa ki karkhana umphniang jong ka Iran hadien ba ka Iran kam shym pyllait ïa ka lynti ïaid jhad na ‘Strait of Hormuz’, kum shi bynta jong ka thma Middle East.
Kane ka jingpynshitom kaba thymmai ka thew ïa ki lad pynpoi umphniang da kaba buh da ki jingpynshitom ïa palat ar phew ngut ki briew, ki kompeni bad ki lieng kiba treikam hapoh ka network jong u heh paid umphniang u Mohammad Hossein Shamkhani, ong ka tnat pla tyngka.
“Ka tnat pla tyngka ka ïaid beit ïaid ryntih bad ka ‘Economic Fury’ da kaba thmu ïa ki riew pawkhmat jong ka sorkar kum ka longïing Shamkhani kiba pyrshang ban kamai pisa ha ka jingduhnong jong ki paidbah ka Iran,” ong u myntri pla tyngka jong ka US, u Scott Bessent ha ka jingpynbna, da kaba kdew sha ka jingpynbor pisa pyrshah ïa ka Iran.
U Shamkhani u dei u khun jong u heh ka tnat iada ri u Ali Shamkhani uba dei u nongai jingmut jong u nongialam ba hakhlieh jong ka Iran u Ali Khamenei, ha kaba baroh arngut ki la shah pyniap ha ka 28 tarik u Rymphang, ka sngi ba nyngkong jong ka jinghiar thma jong ka US bad ka Israel bad ka jingsdang jong ka thma Middle East.
“Ka America ka leh ban khanglad da kaba kut ïa ka jinglah jong ka Iran ban pynmih khajna katba ka dang pyrshang ban bat ïa ka Strait of Hormuz kum ka nongshah teh mraw”, la ong ka tnat kam pohïing ha ka jingpynbna ba kyrpang.
Ka Iran ka la khang da kaba suk ïa ka duriaw Hormuz, kaba dei ka lynti kaba kongsan ban shalan ïa ka umphniang bad ka gas, kum ka jingpynshitom bein ïa ka jingiakhih thma jong ka US bad Israel.
Mynta ka America ka dang don ha ka jingkhang dam jong ki shipai duriaw ïa ki kad liengsuiñ jong ka Iran.
Ha ka sngi Balang, ka tnat pla tyngka ka la ong ba kan nym pynjlan ïa ka jingpynlait ïa ki jingpynjari kyndon ba shipor kaba ailad ban die ïa ka umphniang Iran kaba la don lypa ha duriaw. Kane ka la long ka jingpyrshang ban pynduna ïa ka jingeh ha ka dor jong ka umphniang kaba la kiew namar ka thma.
Ka America ka kynnoh ba ka Shamkhani Network kaba treikam ha Iran bad ha United Arab Emirates ka lait na ki jingpynjari kyndon lyngba ka kynhun jong ki kompeni ai jingmut bad kit lieng kiba i kumba ki long kiba dei hok kiba pyniaid ïa ki jhad jong katei ka network.
Ha u snem ba la dep ka America ka la pynjari da ki kyndon pyrshah ïa ki kynhun kiba ïadei bad kane ka network.
Ka tnat pla tyngka ka la pynbna ruh ha ka sngi thohdieng ba ka pynjari ïa ki kyndon aiñ pyrshah ïa uwei u briew na Iran uba kyrteng u Seyed Naiemaei Badroddin Moosavi, ïa uba ka la batai kum u nongpynïaid pisa na ka bynta ka kynhun lehnoh ba la kyrshan da ka Iran, ka Hezbollah, bad “lai tylli ki kompeni kiba don jingïadei bad ka skim pynkylla pisa kaba jylliew jong ka Vezuil ochange ha Iranian ksiar.”
