Jerusalem, Iaiong:
Ka tnat shipai jong ka Israel, ka la pynmih ïa ki hukum ba thymmai ban phah kynriah noh ïa ki paidbah nongshong shnong jong ka thaiñ Shatei Lam Mihngi jong ka Lebanon ha ka Sngi U Blei, ha kaba ki la bthah ïa ki nongshong shnong, ba kin mih noh na ki hynñiew tylli ki shnong, kiba don shabar jong ka “buffer zone” kaba ka la bat, ha shwa ka jingsangeh thma, kaba khlem lah ban pynsangeh pura ïa ki jingïaleh pyrshah.
U Lamphang ka tnat shipai Israel u la ong ha ka kyrwoh hapoh ka rynsan X ba ka kynhun lehnoh jong ka Lebanon ka Hezbollah ka pynkhein ia ka jingsangeh iasiat bad ba ka Israel kan leh pyrshah ia kane, da kaba ong ia ki briew ba kin leit shaphang shatei bad shathie jngai na ki nongbah.
Kitei ki shnong ki don shaphang shatei jong ka wah Litani bad ka zone kaba don shathie jong ka Lebanon ba la bat da ki shipai Israel, kiba la bteng ïa ki kam shipai wat hapdeng ka jingsangeh thma.
“Na ka jingïohi jong ngi, kaei kaba pynbor ïa ngi ka long ka jingshngaiñ jong ka Israel, ka jingshngaiñ jong ki shipai jong ngi, ka jingshngaiñ jong ki shnong ki thaw jong ngi,” ong u Myntri Rangbahduh jong ka Israel, u Benjamin Netanyahu, ha ka jingïalang jong ka kynhun myntri ha Jerusalem.
“Ngi leh da kaba tyngeh katkum ki kyndon kiba ngi la iakut bad ka ri America, bad kumjuh ruh, da kaba ong, bad ka Lebanon.”
Ka tnad shipai jong ka Israel, ka iathuh ba ka la bat ia lai tylli ki drone, ha shwa ba kin iaid lyngba sha ki jaka jong ka Israel, hadien ba ki siren, ki la sawa ha ki bynta ba shatei jong ka Israel.
Kham mynshwa ha ka Sngi U Blei, ka Hezbollah ka la ong ba ka la hiar thma ia ki shipai Israel kiba don hapoh jong ka Lebanon bad kumjuh ia ki kynhun ai jingiarap kiba la wan ban pynkynriah ia ki.
Ka jingsangeh thma kaba la pynïasoh da ka US, kaba la sdang naduh ka 16 tarik u Iaiong bad la pynjlan haduh ka shiteng jong u Naitung, ka la wanrah ïa ka jingduna kaba jur ha ka jingïaleh pyrshah hapdeng ka Israel bad ka Hezbollah, watla baroh arliang ki la ïai bteng ban siat iwei ïa iwei pat, da kaba ïakhaïi ïa ka jingkynnoh halor ki jingpynkheiñ aiñ.
Haduh 2500 ngut ki briew ki la ïap ha ki jinghiar thma jong ka Israel naduh ba ka thma kaba dang shen eh hapdeng ka Hezbollah bad ka Israel ka la sdang ha ka 2 tarik u Lber, katto katne sngi hadien ba ka US bad ka Israel ki la hiar thma pyrshah ïa ka Iran.
