Dhaka, Iaiong:
Uwei u nongpeit jong ka jakamane ‘Hindu’ kaba don hapoh katei ka ri Bangladesh, la ong ba la lap ia ka metiap jong u kaba la sdien phasi halor u dieng, tang hadien 3 sngi ba u la jah napoh ka jaka sah jong u, sha ka phang Sepngi jong ka Bangladesh.
Ia utei u briew la ju ithuh kum u Nayan Sadhu, uba la don 40 snem ka rta, uba long u nongshong shnong jong ka thaiñ Dohazari kaba hap hapoh Sthania Upazila jong ka distrik Chhattogram, bad u long u nongkhmih jong katei ka jakamane bad u long ruh ha kajuh ka por u nongialam jong katei ka jaka mane Shivakali jong ka Khurushkul Union hapoh Cox jong ka Bazar Sadar Upazila, la iathuh ka Bangladesh Hindu Buddhist Christian Unity Council (BHBCUC) ha ka Sngi U Blei.
La iathuh ba 2ngut ki briew ki bym lah ban ithuh ki la ialam ia u Nayan bad ki ha ka por janmiet jong ka 19 tarik u Iaiong, bad hadien lai sngi, la lap ia ka met jong u kaba la sahkut ha u dieng ha ka jaka lum kaba don sha rud shnong, ong ka khubor pulit bad ki nongshong shnong ha ka dong Cox’s Bazar.
Ha ka jingpynlait khubor, ka konsil ka la dawa ban pynshitom da kaba tyngeh ia ki nongleh kam sniew, kiba don kti ha ka jing pyniap ia u.
“Ka Unity Council ka pynrem jur ia kane ka jingjia bad ka dawa ban kem mardor bad ban ai ka jingpynshitom kaba long ka nuksa ia ki nongleh kam sniew,” la ong ka forum ha ka kyrwoh.
“Ngi shu lah ban sngewthuh kaei kaba lah ban long ka jingthmu ban pyniap ia u nongsumar ba rit paid jong kawei ka tempi kaba rit bha ha ka jaka kaba jngai bha,” la ong u dkhot ba rangbah jong ka BHBCUC, u Kajal Debnath ha ki nongthoh khubor.
U general secretary jong ka Cox’s Bazar unit jong ka Bangladesh Puja Celebration Council u Jony Dhar u la iathuh ba la sei ia katei ka metiap hadien lai sngi hadien ba u Nayan u la jah rngai, kaba pyni ba u la shah pyniap.
Ki pulit ki la iathuh ba la phah leh ia ka autopsy khnang ban tip ia ka daw ba thikna jong ka jingiap.
La sdang ia ka jingtohkit hadien ka kaiphod jong utei u briew ba jah ba la ai da ka kurim jong utei u rangbah ha ka 19 tarik u Iaiong.
Ha katei ka jaka ka 9 tarik u Iaiong, ka konsil ka la ong ba ki la don haduh 133 tylli ki jingjia jong ka jingïakynad hapdeng ka 1st u Kyllalyngkot bad
ka 31 u Lber mynta u snem ha Bangladesh.
