Ka jingïap ha ngi ki briew ka wan khlem poi pyrkhat. Balei hap ban ong kumta ? Namar ha ka jingïap jongngi ki briew ngi ju lap bad ju shem ba ka jingïap ka wan jia ryngkhat ha ngi ki briew namar u briew ne ka briew kiba khlem pang ne kiba la pang la shitom da bun snem ki khlad noh khlem poi pyrkhat.
Kum ki briew ne kiba ha ïing ha sem la khmih lynti ba ka sngi jingïap ka la jan ha kano ma kano ka por khamtam kiba la tymmen.
Hynrei ka long dakhongpong kito kiba don jingpang ha ïing ha sem ki ïap shuwa pynban khlem poi pyrkhat ne khmih lynti ba kin ïap. Katba kiba la pang la shi-tom la bunsnem kim ïap. Ka jingim jong-ngi ki briew pleng ka long ka bym lah ban mutdur.
Namar ha ka jingshisha dei ban ïap shwa ki kmie ki kpa kiba la tymmen bad la noh ka rta. Hynrei ïap pynban ki khun ba dang rit dang samla ban ïa ki kmie ki kpa.
Imat ka jingïap ka long kumba la thoh ha ka ktien u Blei kaba ong, hynrei shaphang kata ka sngi bad kata ka por ruh ym don ba tip lymne ki angel ki bneng, hynrei tang u kpa jong nga hi (Math 24 : 36). Ka jingïap ka wan kyndit ha kano kano ne ha uno uno u briew bad ngim lah ban tip lypa ha kano ka sngi u bnai ne u snem ba u briew un ïap ne ïoh noh ïa kane ka pyrthei. Ka jingïap ka dei ka jingduh noh ïa ka met bad ka mynsiem jongngi ki briew.
C. B. Iawphniaw
