U Nongsaiñ Hima, 1979
Ka jingpule kot kam dei ka kam kai, hynrei ka dei ka kam ïap kam im. Ka dawa na u ne ka nongpule kot khamtam na ki khynnah skul bad samla pule College ka jingpynleit jingmut kaba jur.
Haba ka dawa ka jingpynleit jingmut kaba jur, dang lah shuh mo ban don sa kiwei pat ki jingmut jingpyrkhat jong u ne ka nongpule ? Ka jubab ka long, em, ka jabieng jong u kam lah don jaka ne por shuh ban pyrkhat sa ïa kiwei pat, lait noh tang ki kam ban ïarap ha ïing ha sem, ka por ïalehkai bad ki kam kiba ïadei bad ka jingpynkhuid pynsuba ïa la ka met ka phad. Lada dang don shuh kiwei pat ki jingpyrkhat nalor kitei kiba la ong, khlem pep uta ne ka khynnah ne samla kin ym lah ban jop ha ka thong.
Lada u briew baroh u la nang lypa, te ym donkam shuh ban don kiba thoh kot ne wad jingstad shaphang ka haw haw ne u Bnai ne yn ym dokam shuh ban aiti ïalade kumba ïaleh u Conrad bad u Cooper ban nang tip shuh shaphang ka haw haw bad u Bnai. Wat ki skul ruh kim donkam shuh.
Namar ba ngim tip eiei, kumta ka jingpule minot bad ka jingshah hikai ka donkam bad kine ki dawa ka jingpynleit jingmut batylli bad bapura ban tip bad nang.
Tang ban shu pule ruh ym long, dei ban pynleit jingmut, lymda kumta ngin long thik kum u tuta. Ha ka por examin ngin shu ang kum u muid lada pynpher tang khyndiat ïa ki jingkylli. Baroh ki jinghikai ne jingtip na kaba ngi pule bad shongskul ki dei ban rung hapoh ka jabieng jong ngi bad ngi dei ban long trai ïa ki khnang ba ynda dei ka por ba donkam kum ha ka por examin, ngi lah ban tei ïa ki. Namar dei tang u trai uba lah ban ai ne sei na synduk ïa ka spah ka hajar.
ïa kane ka por bad ka ryta pule kot kaba long ka aiom ksiar jong u briew, ki Hindu ki khot ïa ka “Bramachari.” Ha ki, ka dei ka por bad ka jingim jong ka jingtrei shi-tom, ka jingaiti ha ka pule, ka jingpyrkhing ïalade, ka jingkiar na ki jingsngewbha pyrthei bad jingbrai ka doh, na ki jingmlien bad na ki lok kiba sniew.
