Shillong, Jymmang 07
U Symbud Myntri Rangbah ka Jylla ba khmih ïa ka tnad Kam Pohïing Bah Prestone Tynsong u la ong ba ka Sorkar Jylla ka la ujor sha ka ïingbishar Meghalaya High Court pyrshah ïa ka hukum jong ka ïingbishar ka District ba ai jamin ïa ka Sonam Raghuvanshi, kaba dei ka nongshah kynnoh ba hakhmat eh ha ka jingpynïap ïa la u lok na Indore, u Raja Raghuvanshi ha ka por ba ki wankai sha Sohra.
U la ong ba um kwah ban kynthoh namar ka Sorkar ka la dep ban ujor sha ka ïingbishar Meghalaya High Court, kumta u la shaniah ha ka ïingbishar ba kan rai namar ba ki ïakhun pyrshah ïa ka jamin ba la ai da ka ïingbishar ka District bad un ap ïa ka rai jong ka ïingbishar.
Shuh shuh u Bah Prestone u la ong, ba ki pulit ophisar bad ka Special Investigation Team ki la pynbiang bad pynkhreh bha ïa ka jingtohkit.
“Ha kaba ïadei bad ka jingpynïaid ïa kum kine ki mukotduma, phi tip ïa ki rukom treikam, ki kyndon kiba hap ban bud. Kumta kam don kum kata ka jingbakla na ka liang ki pulit bad kumba nga la ong, ha ka ïingbishar ka ju jia ba kawei ka ïingbishar ka lah ban ai jamin, kawei pat ka ïingbishar ka lah ban pynsangeh ïa ka jamin, kumta ka ïingbishar kan sa rai,” u la ong.
Kumban shu pynkynmaw ba ha ka 27 tarik Ïaïong, ka ïingkashari Magistrate ka la ai jamin ïa ka Sonam Raghuvanshi, kaba dei ka nongshah kynnoh ba hakhmat eh ha ka jingpynïap ïa la u kurim, hadien ba ka la rai ba ki pulit kim shym la lah ban pyntip bha ïa ki nongrim ba la kem ïa ka.
Ka ïingbishar ka la kdew ïa ki jingbym ïahap kiba paw ha ki kot ki sla ban kem ïa ka.
