Shillong, Jymmang 07
Ka Voice of the People Party (VPP) State Youth Wing hapoh ka jingïalam u Bah Marbud Dkhar, President, ki la leit ban ïakynduh ïa u Pro Vice Chancellor ka North Eastern Hills University (NEHU), u Prof Sumarbin Umdor, halor ka jingbym ïaid beit ïaid ryntih ka jingthung kam thung jam ha NEHU, naduh u snem 2023.
Kane ka jingthep kam ba lait kadei naduh u 2023, hynrei haduh mynta, kim shym la khot ban ïaleh ïa ka exam ïa kine ki post na ka bynta ki samla kiba la dep ban thep.
Haba kren sha ki lad pathai khubor, u Bah Marbud Dkhar, President, u ong ba hadien ba la dep ban ïakynduh ïa u Pro VC ki la ïoh ka jingpynshai, ba ka daw kadei namar ka jingmih ka kynrum kynram hapoh katei ka Skulbah ha u snem 2024, kaba la hap ban pynslem noh ban khot phah ïaleh ïa ka exam ïa ki nongaplai baroh.
U la ïathuh ba kine ki kam ba la pyllait ha u 2023, kidei ki Non-Teaching staff bad ka don ka Group-B bad Group-C.
Ka seng ka la ïoh jingujor na ki samla kiba aplai ha kine ki kam, ba kim shym la pat ïoh ban thoh ïa ka exam naduh u snem 2023, bad haduh mynta ruh. Ki nongthep ïa kine ki kam ba lait, ki la don da ki phew hajar ngut eiei, u la ong.
U Bah Marbud u la ong, ba ka VPP SYW ka pynpaw ka jingsngew bynñiaw, ba katkum ka jingïakren bad u Pro VC u ïathuh ba naduh ba jia ki jinghuri hura ha NEHU, ka jingtreikam hapoh Skulbah NEHU ka la dkoh bha naduh u snem 2024.
Shuh u la ong, ba na ka liang u Pro VC u la pynthikna ba yn sa pynphai biang ïa ka pisa bai thep sha kito ki nongaplai baroh.
“Ngi pynpaw ïa ka jingsngewsih, ba hapoh ka Skulbah NEHU ym don u Vice Chancellor (VC) bad kiwei kiwei, bad u Pro VC, Bah Sumarbin Umdor marwei ba u don, ka la shem jingeh shaba palat ban pyntyllun ïa ka kam ha Skulbah NEHU. Haba ïadei bad kane ka kam, ka VPP SYW kan sa nangïai buddien nangne shakhmat,” la bynrap u Bah Marbud.
U la ong “Ngi la ïoh jingtip ba une u VC un sa shongthait noh ha u bnai Naitung (July) 2026, bad ngi ngeit ba lada u VC un shongthait noh na ka kam VC ha Skulbah NEHU, ngin sa ïoh noh da u wei u VC ba thymmai, bad kyrmen ba ki kam kin sa ïaid beit ïaid ryntih shakhmat”.
