Shillong, Jymmang 07
“Nga rung sha ka politik namar nga kwah ban long kum ka mluh bad ka jingshai sha ki nongshong shnong ban pynjaijai ïa ka jingmut jingpyrkhat, ban weng ïa ka jingkhim mynsiem ban weng ïa ka jingisih para briew,” la ong u Dr. DRL Nonglait haba kren ha ka jingïalang ka General Executive Council jong ka NPP Khasi bad Jaiñtia Region hadien ba u la shah pynbna kum u kyrtong ban ïakhun ïa ka ilekshon MP Lok Sabha shiteng samoi na Shillong Constituency.
Haba batai shaphang ka jingshah khot ban ïakhun ïa ka ilekshon MP Lok Sabha, u Dr. Nonglait u la ïathuh ba ha ka 28 tarik mynshem bnai haba u dang thiah ha hospital la paw u number bym don kyrteng hynrei haba la kren la jubab ba uta uba kren dei u Conrad K Sangma, u Myntri Rangbah ka Jylla.
“Ha kata ka jingïakren, nga la ong ba ngam lah ban leit ïakynduh namar nga don ha hospital hynrei u la ai ban phah kren ha u Bah Prestone,” u la ong.
U la ïathuh ba dei ha ka 29 tarik ha ka por 7 baje janmiet, ki nongkitkam ka NPP kiba don kumba 20 ngut ha jingïalam u Bah Hamlet Dohling kum u Working President bad Bah HM Shangpliang kum u nongaiktien ki la tyrwa ban ïakhun noh na ka NPP ïa ka ilekshon MP Lok Sabha hynrei u la pan por haduh hynriew sngi ban ai jubab.
Ha kine ki hynriew sngi, u Dr Nonglait u la hiar sha shnong sha Pariong bad Lawbyrtun ban ïakynduh ïa kiba haïing hasem bad ki paralok bad dei ha ka 6 tarik mynta u bnai u la ai ïa ka rai ban pdiang ïa kane ka jingtyrwa.
Hashwa ban pynbna kum u kyrtong, u Dr. DRL Nonglait u la rung kum u dkhot ha kaba ki nongïalam ka NPP naduh u Conrad K Sangma, Bah Prestone Tynsong bad Bah Sniawbhalang Dhar ki la pdiang burom ïa u.
U Dr. DRL Nonglait u la wan poi sha phyllaw ha State Central Library da kaba shan da u diengduh namar ba u shitom ka kjat naba u ur ha ïing hynrei u la kular ba un sa khlain noh ha kine ki sngi ban sdang ban leit pynshai ïa ka nongrim jong ka seng sha ki paidbah.
U Bah Prestone Tynsong uba dei u President ka NPP Meghalaya Unit u la pyntip ba ka jingïalang kaba nyngkong ban pynshai sha ki paidbah kan sdang naduh ka 11 tarik mynta u bnai ha shnong jong u Dr. DRL Nonglait ha Nongshyllong kaba hap ha Eastern West District.
U Dr. DRL Nonglait u dang dei u nonghikai ha skulbah NEHU jong ka Khasi bad uba dei ruh u President ka Khasi Authors Society kaba ïakhun ban ithuh noh ïa ka ktien Khasi kaba la urlong ha kaba ka Sorkar ka la ithuh ïa ka ktien Khasi bad Garo kum ka ktien Sorkar.
U Conrad K Sangma uba la pynbna paidbah ïa ka kyrteng u Dr. DRL Nonglait kum u kyrtong ka NPP sha ka ilekshon MP Lok Sabha u la ong ba ka seng kan trei shitom miet bad sngi ban wanrah jingjop.
U la ban ba un nym shim ïalade kum u President ka NPP hynrei un shim kum u nongtrei bad lada dei ban pynbeit shuki bad tah poster kam pher na bynta jong u, un hap ban trei shitom ban wanrah ïa ka jingjop ha kane ka ilekshon shiteng samoi.
