Shillong, Jymmang 07
Ka jingkhrong ha ki jaka pynïeng kali ha kylleng ka Sor Shillong bad ki shnong kiba marjan, ka ïapher na kawei ka shnong sha kawei pat, don kiba shim 40 tyngka shi kynta, don ruh kiba shim 30 tyngka ha ka shi kynta ïa ki kali saw shaka.
Na ka liang u Commissioner & Secretary ka Sorkar Meghalaya jong ka tnad Urban Affairs, u Dr Vijay Kumar lyngba ka Notification number UAU/88/2024/654, kaba u la pyntip ha ka 27 tarik u Ïaïong 2026, ka la kren shai ba na ka bynta ka jingkhrong bai ïeng, khamtam ha ki rud surok hapoh ka Greater Shillong Planning Area, la pynkylla noh ïa ka dor, da kaba la weng noh ïa kata ka High demand ne ka Low demand Zones.
Shuh shuh ka jingpynbna ka la batai ruh ïa ka dor na ka bynta kito kiba pynïeng kali harud surok, ba ka dor ba thymmai ba ki dei ban siew ka dei 20 tyngka shi kynta na ka bynta ki kali saw shaka bad 10 tyngka shi kynta na ka bynta ki ar shaka, kane kan trei kam naduh ba la pynmih ïa kane ka jingpynbna ne ka Notification.
Ïa kane ka jingpynbna, ka Sorkar ka la phah ruh sha ki Rangbah Shnong, ba kin tip ïa kane ka jingbthah haba ïadei bad ka dor, ba ki kali kin siew bai ïeng.
