Mawkyrwat, Jymmang 07
Ka Khasi Student’s Union (KSU) South West Khasi Hills District ka pynrem jur halor ka jingleh thurmur ka ophis jong u Agriculture Development Officer (ADO) Ranikor C&RD Block da kaba phah shithi ha ka ktien Garo ïa ka shnong 25 Mile, South West Khasi Hills District ha kaba ïadei bad ka skhim nongrep PM-KISAN.
Ka seng lyngba ka kyrwoh khubor na u samla Plosbor Kharjahrin, Secretary Environment & Cultural Cell ka kynthoh jur halor kane ka jingleh thurmur kane ka tnad Sorkar ba kumno kam wad bniah shwa ban phah ïa ka shithi ha ka ktien Garo haba kane ka shnong ka dei ka shnong ba sah tang ki Khasi bad u Sordar ruh u dei u Khasi.
Shuh shuh u la ong ruh ba katkum ka Ordinance jong u snem 2026 la kdew shai ha ka section 4, kaba ong watla ha ka Jylla la ithuh ïa ka ktien Khasi, Garo bad English kum ki Official Languages hynrei la kdew pat ha kane ka aiñ ba ha ki jaka ba hap ha Khasi Jaiñtia lah ban pyndonkam tang da ka ktien Khasi lane English ym kiwei pat ki ktien.
Kumta ka seng ka maham ïa ki ophis Sorkar jong ki tnad bapher-bapher ba nangne shakhmat shwa ba kin phah ïa ki shithi ne jingthoh sha ki shnong ki dei ban da wad jingtip bniah shwa.
