Nongpoh, Jymmang 07
Bun na ki paidbah nongleit nongwan ha ka surokbah National Highway 6 ki la pynpaw ïa ka jingud jingnam halor ka jingdheng kali ha khyrdop khrong khajna (Toll Plaza jong ka National Highway Authority of India (NHAI) kaba don ha 20 Mer Pahammawlein ha Ri Bhoi District ha kine ki khyndiat sngi ba la dep.
Haba pyrshang ban wad jingtip halor katei ka bynta, ki nongtrei ha katei ka khyrdop ki la ïathuh ba ka daw dei ba naduh ka 1 tarik u Jymmang 2026, ka Indian Highways Management Company Limited (IHMCL) kaba hap hapoh ka NHAI, kala pynmih ïa ka hukum ban pynduh noh ïa ka jingshim pisa pliah (discontinuation of manual transaction) ha ki khyrdop khrong khajna jong ka NHAI ha baroh kawei ka ri kum shi bynta ban pynshlur ïa ka rukom siew pisa lyngba ka internet lane kata ka digital payment.
Ki nongtrei ka khyrdop kila kubur ruh ïa ka jingdheng kali hadien ba la pyntreikam ïa katei ka hukum ka IHMCL, hynrei mynta kala sdang ban ïaid beit ïaid ryntih bad ka jingdheng kali ruh kala duna bha, kila ïathuh.
Shuh shuh, ki nongtrei ka khyrdop kila ïathuh ba bunsien ka jingdheng kali hapoh katei ka khyrdop ka dei namar ba ki don katto katne ki paidbah nongleit nongwan kiba ym don ïa ka FASTag bad ki bym don ruh wat ïa ka rukom siew pisa lyngba ka internet (online payment) katkum katei ka hukum ba la pynmih da ka IHMCL kaba wanrah jingjynjar ym tang ïa ki nongtrei ha katei ka jaka, hynrei ka wanrah ruh ïa ka jingdheng kali naba hateng hateng ka ju mih wat ka huri hura bad ka jingbym sngewthuh jingmut.
Ki la pyntip ruh ba ki don ruh katto katne ki kali ba ki FASTag ruh kila jot bad ki bym treikam shuh naba ki trai kali kim shimkhia ban pynthymmai ïa la ki FASTag ki jong ki bad ba na ka liang ka jongki ruh kim lah shuh ban shu thep da ka nombar kali ban siew pisa kumba ju leh ha ki por ba la dep ba ki nongleit nongwan ki bym don ne kiba la sniew ka FASTag ruh ki lah ban siew da ka pisa pliah.
