Jerusalem, Jymmang:
Katkum ki khubor, la ong ba ka Israel ka la ther biang sha kito ki bynta jong ka nongbah Gaza ha ka Sngi Thohdieng, ha ka jingpyrshang jongka ban ioh pynliem ïa uwei u nongialam ba ha khlieh jong ka kynhun lehnoh Hamas. Namar ka Israel ka la pynpaw ïa ka jingwad bniah jongka, ba la lap ba utei u heh nongialam ka Hamas, u long uwei napdeng kito kiba thmu ïa ka jingleit thombor sha Israel kaba la jia ha ka 7 tarik u Risaw jong u snem 2023. Watla katta, la ong ba na ka liang jong ka Hamas, kam shym la jubab ne pynphai ktien haba iadei bad kane ka jingleh jong ka Israel, lane halor ka jinglong- jingman jong u Izz al-Din al-Haddad, uba la long u nongialam jong katei ka kynhun lehnoh Hamas hapoh Gaza Strip hadien ka jingshah pyniap jong u nongialam barim u Mohmmad Sinwar, ha u Jymmang jong u snem 2025.
La iathuh ba u Haddad, u long nongialam ba haklhieh duh napdeng kiwei pat ki heh nongialam jong ka Hamas, kiba iadon bynta ha ka jingthmu ban leit thombor ïa ka Israel ha u Risaw ba sdang jong ka thma Israel bad ka Gaza. Ki tnat ka koit- ka khiah jong ka nongbah Gaza, ki la pyntip ba ha katei ka jingleit thombor jong ka Israel ha ka Sngi Thohdieng, ki la don 3 ngut kiba la duh noh syndon ïa ka jingim jongki bad 20 ngut kiwei pat ki la ngat lang bad mynsaw ha katei ka jingjia.
