Washington, Jymmang:
Hadien ka jingbyrngem ba jai-jai jong ka Iran halor ka thup ba 5 mat jong ka US na bynta ka jingiakren pynbeit bad ka Iran, u Trump ha kane ka kynti pat u la byrngem biang ïa ka Iran ba un leit ban kput biang ïa ka, lada kam lah ban pdiang ïa ki jingtyrwa bad ki jingpynbeit jong ka US, ha kaba u la ong ba ka US kan leit ban ther bom naphang ïa ka Iran bad kan nym pynsah shuh wat tang khyndiat ruh.
Ha katei ka jingkren jong u hapoh ka rynsan ‘Trust Social’ jong u, u Trump u la ong “Ia ka Iran, ka por ka la nang ïaid bad ka la jan kut, kan kham bha ïa ka Iran ba kan pynkhreh noh lane kan pynkloi noh ïa ki rai, khlem da pynslem shuh, lym kumta, ka US kan pyn-um lut phloiñ ki jingdon- jingem jong ka Iran bad kan nym pynsah eiei shuh”.
Katei ka jingbyrngem ba khatduh jong U Trump, ka long tang hadien katto- katne kynta, ba u la iakren bad U Benjamin Netanyahu, u Myntri Rangbahduh jong ka Israel, ha ka Sngi U Blei, ha kaba, kine ki arngut ki nongialam ki la ioh ban iakren halor ka jinglah ban bteng biang ïa ka thma bad ka Iran, katba U Trump u la iathuh ruh ïa u Netanyahu, halor ka jingleit jong u dang shen sha China, ong ka khubor jong ka tnat pathai khubor jong ka Israel.
Kham mynshwa, ka tnat pathai khubor jong ka Iran, ka la iathuh ba ka US, ka la wanrah ïa ka thup jong ki san tylli ki mat, kaba kynthup ïa ka jingpynpoi Uranium sha United States bad buh pud
ka Iran ha kiba bun ki bynta.
Katkum ka khubor, ka US ruh ka la kyntait ban pyllait wat tang 25% na ki marpoh khyndew jong ka Iran kiba la shah pynsangeh ne ban siew ïa ka jingjulor kaba la pynlong ïa ka Iran ha ka por thma.
Kham mynshwa ha ka jingtyrwa jong ka, ka Iran ka la khot ban pynkut noh ïa ka thma ha baroh ki liang, kynthup ïa ka Lebanon, kaba dei ka bynta ba kongsan jong ka jingïakynad bad ka Israel. Ka Tehran ka la dawa ruh na ka US ba kan sangeh noh ïa ka jingkhang khyrdep jong ki shipai duriaw ïa ki kad liengsuiñ jong ka Iran.
La palat shibnai naduh ba ka US bad ka Iran ki la mynjur ïa ka jingïateh kular kaba jem bha, hynrei ka jingïakren kaba kham bniah ka dang sahkut namar baroh arliang mamla ki kyntait ban ailad ïa ki jingdawa jong ki. Katba ki jingpyrshang kiba dang ïaid shakhmat kim shym la lah ban pynkut noh ïa ka thma kaba la pynthut ïa ka jingpynbiang bording ha ka pyrthei, kaba la pynkiew dor ïa ka umphniang bad kaba la phah ïa ki jingkyndit lyngba ki ïew ki hat.
Ka thma ka la buh jingeh bha ïa ka ïoh ka kot jong ka America, ha kaba stet ka la kylla long ka jaka kaba tlot na ka bynta u president ka Republican ha shwa ka elekshon shiteng samoi ha u bnai Nohprah. Ki heh sorkar kiba tip bha ïa ki jingïakren ki la ïathuh ha ka Axios ba katba u Trump u kwah ïa ka jingïateh kular ban pynkut noh ïa ka jingïakynad, ka jingkyntait jong ka Iran ïa ki jingdawa jong u bad ka jingkyntait jong ka ban ailad ïa ka prokram nuclear jong ka, ka la buh biang ïa ka lad shipai ha ka miej.
