Kyiv, Jymmang:
U President ka Ukraine, u Volodymyr Zelensky ha ka Sngi Balang u la iathuh ba u la dep phah ïa ka jingthoh sha u President ka US- u Donald Trump bad sha ka sorkar Congress jong u, halor ka jingdonkam kyrkieh jong ka Ukraine ïa ki tiar ïakhun bad khamtam ki ‘namding ba kan ioh ban ïakhun bad ïada ïalade na ki jingleit thombor jong ka Russia.
Ha kajuh ka por, ki nongthaw aiñ jong ka Russia, ki la kyrshan ïa ka ‘Draft Bill’, ba ki nongtrei jong ki bank, kin iasnohkti lang ha ka jingiakhun pyrshah ïa ki drone jong ka Ukraine, kiba leit ban rung bad ban leit thombor shapoh u pud- u sam jong ka Russia, ha kaba ki nongtrei jong ki bank kiba la dep shah hikai, kin lah ban tehlakam bad ban siat pynbthei ïa kitei ki drone kiba wan poi na Ukraine.
Kine ki sienjam ki long hadien ka jingjur jong ka jingiakhun thma na suiñ ba dang shen na baroh arliang ha ka thma kaba la neh palat saw snem kaba la bud hadien ka jinghiar thma ba pura jong ka Russia ïa ka ri marjan jong ka. Ym don kawei ruh ka liang kaba la lah ban kiew bha ha ka lynti ba shakhmat kaba jngai 1,250 kilomitar (780 mail).
Kumjuh ruh ha ka sngi thohdieng, ka Anne Keast-Butler, kaba dei ka khlieh jong ka tnat syntiat jong ka UK, ka GCHQ, ka la pynskhem ba u President ka Russia, U Vladimir, “U Putin, u dang iaid shadien ha ka madan thma.” Ki jingtip ba thymmai ki pyni ba “jan shiteng million ki shipai Russia mynta ki la shah pyniap naduh ba sdang ka jingialeh,” ka la bynrap.
Ka Ukraine, ka la siat ïa ki thong jong ka Russia, khamtam ïa ki jaka pynmih umphniang bad ki karkhana shna tiar, da ki drone, kiba la pynmih hapoh ka ri. Ha kajuh ka por, ki shipai Russia ki la pynjur ïa ki jinghiar thma jong ki na suiñ, da kaba siat haduh 90 tylli ki namding bad kumjuh ruh da ki spah tylli ki drone ha Kyiv ha ka taiew ba la dep ha ka jingpyrshang ban pynliem ïa ki jaka ïada suiñ.
U nongïalam ka Ukraine, ula kyntu ïa U Trump bad ka Congress, ha ka shithi, kaba la ïoh da ka The Associated Press, ba kin pynbiang shuh shuh ïa ki namding Patriot PAC-3 bad kiwei kiwei ki tiar ïada suiñ, ha kaba u la maham ba ki jingpynpoi sha Ukraine, ki nang hiar haduh katta katta, namar ba ka thma Iran, ka pynphai ïa ki mar jong ka US.
Ka Ukraine ka la pynkiew ïa ka jingïohkem ïa ki drone jong ka sha palat 90%, ong ka shithi, bad ki riew shemphang jong ka Ukraine ki la ïarap ïa ki ri ha ka thaiñ Mihngi – khamtam eh ïa ka thaiñ Gulf Arab – ban pynkhlain ïa ki jingïada ha suiñbneng. Ki la iarap ruh ha ki ktem shipai jong ka America ha Mideast, ong ka shithi.
Hynrei ka Ukraine kam pat lah ban pynmih ïa la ki jong ki tiar ïada pyrshah ïa ki namding, ong u Zelensky, bad na ka bynta kata ka shaniah “jan tang ha ka ri America.”
