Kyiv, Jylliew:
U President ka Ukraine, u Volodymyr Zelensky, ha ka Sngi Palei, u la tyrwa ban ïakynduh markhmat bad u Vladimir Putin, ha ka shithi ba plie kaba duna bha sha u nongïalam jong ka Russia bad kane ka long ruh tang hadien ba u heh jong ka Russia, u la kam ba ka Moscow, ka donkam ban pynkhlaiñ ïa ki lad jingïada suiñ jong ka, hapdeng ka jingjur jong ki jinghiar thma jong ka Ukraine.
Ka Kremlin ka la ong ba ïa u Putin ym pat pyni ïa kane ka shithi, hynrei ba u Zelensky u lah ban ïakynduh ïa u Putin ha Moscow “ha kano kano ka por” – ka jingtyrwa kaba u nongïalam ka Ukraine u la kyntait lypa ha ka shithi jong u.
“Ka Ukraine ka tyrwa ban pynkut noh ïa kane ka thma lyngba ka jingïakren beit hapdeng jong ngi – bad phi. Nga tyrwa ïa ka jingïakynduh lang,” ong u Zelensky ha ka shithi.
“Nga tyrwa ban buh ïa ka tarik kaba shai na ka bynta kane ka jingialang,” u la ong.
“Ka Ukraine ka long kaba la pynkhreh na ka bynta ka jingsangeh thma kaba pura katkum ka jingiateh”, u la bynrap.
U Zelensky u la pynmih ïa kane ka shithi shisngi hadien ba ki liengsuiñ drone jong ka Ukraine ki la ther ïa ka Saint Petersburg, ka nongbah trai jong u Putin kaba pynlong ïa ka jingïalang kaba heh bha ha ka liang ka ïoh ka kot jong ka pyrthei ha kane ka taiew.
U Zelensky u la khot bunsien ban ïakynduh ïa utei u nongsyntiat barim jong ka KGB, da kaba ong ba tang ka jingïakren markhmat kan ai ïa ka jingïateh kular halor ki jaka.
Ki jingkren beit na u Zelensky sha u nongialam jong ka Russia ki long kiba duna bha.
Ki jingiakren ba la ialam da ki bnai jong ka US kim shym la lah ban pynjan ïa ki arliang mamla sha ka jingiateh.
Ka Russia, kaba la hiar thma ha u snem 2022, ka la dawa ïa ka Ukraine, ba kan mih noh na ka thaiñ Donbas, kaba don shatei lam mihngi jong ka, ha kaba ki bynta kiba heh jong ka, ki shipai jong ka Kyiv, ki dang synshar, kum ka jingpynbeit shwa ban ïakren ïasuk.
Haba ïakren bad ki nongthoh khubor na shabar ri, kynthup ïa ka AFP, ha Saint Petersburg tang shuwa ban pynmih ïa ka jingkyrpad jong u Zelensky, u Putin u la pynkynmaw biang ïa ka jingkylli kaba u ju leh halor ka jinglong hok jong u nongïalam ka Ukraine.
U la ong ba ka jingkylli hato u Zelensky u dei ne em u nongïalam ba hok jong ka Ukraine ka donkam ban “bishar bniah”, hadien ba ka samoi treikam ba nyngkong jong u kaba san snem ka la kut noh ha u snem 2024.
Ka aiñ shipai ka khang pyrshah ïa ki elekshon ha ka por thma ha Ukraine, bad u Zelensky u la tyrwa ban pynlong ïa ka jingthep vote lane ka referendum halor ka jingïateh kular ïasuk kaba khadduh lada ka jingsangeh thma kaba pura ka don ha ka jaka jong ka.
U Putin, u la ong ba un ïakynduh tang ïa u Zelensky, na ka bynta ban pynkut ïa ka jingïateh kular, kaba la dep ïakut, da kaba kyntait ïa ki jingkhot ban ïakynduh shwa katei ka por.
“U Zelensky u lah ban wan ha kano kano ka por sha Moscow”, ki lad pathai khubor jong ka sorkar jylla ki la sot ïa ka jingkren jong u nongaiktien ka Kremlin, u Dmitry Peskov, hadien ba la pynmih ïa katei ka shithi.
