PoK, Jylliew:
Kumba 30 ngut ki briew, ki la duh ei ïa la ka jingim bad 200 ngut pat ki la mynsaw na ka jingiakynad hapdeng ki paidbah nongiakhih bad ki bor pahara jong ka Pakistan Occupied Kashmir (POK) hadien ba ki bor pyniaid ki la khang pyrshah ïa ka Joint Awami Action Committee (JAAC) kaba long ka kynhun pyrshah kaba khlaiñ bad kaba la wanrah ïa shibun tylli ki jingiakhih paidbah ban ïakhun pynrshah ïa ki jingeh ha katei ka thaiñ la ka long ha ka liang ka ioh- ka kot bad ha ka kam saiñ hima- sima.
Ka JAAC ka la shah khang ha ka taiew ba la dep da ki bor synshar, da kaba kdew ba ka don ka jingsngewkhia halor ka suk ka sain bad ka jingshngain jong ki paidbah. Ka jingïakynad ka la mih ha ka nongbah Rawalakot ha ka sngi U Blei hadien ba ka jingïakynad ka la mih halor ka jingïap jong uwei u nongkhaii, uba la shah siat ha ka por ba ïakynad bad ki bor jong ka aiñ ha ka miet jong ka sngi Palei.
U Commissioner Sardar Waheed Khan, uba dei u heh ophisar riew paidbah ha Rawalakot, u iathuh ha ka tnat pathai khubor Reuters, ba ki nongkyrshan jong ka JAAC, ki la ïa lum lang shabar jong kawei ka jaka buh met iap jong ka Hospital, ha kaba la rah ïa ka met jong utei u nongkhaii, hadien ba u la iap ha ka jingshah siat ha ki pulit.
Haba ki bor pahara ki la pyrshang ban pynpra ïa ki nongïakhih, ki nongïakhih jong katei ka kynhun ki la pyndonkam da ki suloi automatic, ki petrol bomb bad kiwei kiwei ki tiar ban thombor ïa ki, u la ong.
Kitei ki jingiakynad ki la jia shisngi shwa ki jingiakhih ba la thmu da ka JAAC, kaba la khot ïa katei ka jingiakhih ban pyrshah ïa ka jingbuh kyrpang ïa ki 12 tylli ki jaka na ka bynta ki nongphetwir ha ka elekshon kaba 27 tarik u Naitung sha ka kynhun thaw aiñ jong katei ka thain, na ki 45 tylli ki jaka kiba la thmu ban ialeh pyrshah. Kane ka kynhun ka dang pyrshah ruh ïa ki jingjia ba kham mynshwa jong ka jingïakynad, ka jingpynlip internet, ka jingkhang jong ka kynhun, bad kumjuh ruh ïa ki mat kum ka jingduna bording, ka jingkiew dor, ka jingbym don kam don jam, ka jingkynnoh ba la pyndonkam bakla ïa ki marpoh khyndew, bad ka jingshah kyntait ha ka saiñ pyrthei.
Ka Human Rights Commission of Pakistan (HRCP) ka la pynpaw ruh ïa ka jingsngewkhia kaba jur halor ka rai jong kata kaba la khot ka sorkar thaiñ ban khang pyrshah ïa ka Joint Awami Action Committee (JAAC) hapoh ka aiñ pyrshah lehnoh.
Ha ka jingpynbna ha ka sngi Nyngkong, ka HRCP ka la pynrem jur ïa ka jingpyndonkam bor palat bad ka jingïap jong ki riew paidbah bad ki bor pynjari aiñ kumjuh, kumjuh ruh ka jingpynthut ïa ka jingïadei.
“Watla ka jingiakren ka long kaba donkam, hynrei kam lah ban long kaba don jingmut hapdeng ka jingshah pynduh hok ha ka sain pyrthei kaba dang iai bteng jong ki briew jong ka thain. Dei ban pynneh ïa ka hok ban iakhih da kaba suk, bad ïa ki jingeh dei ban pynbeit da kaba shai,” la ong ka khubor.
Ka komishon ka la kyntu ïa ka sorkar pdeng bad kaba la khot ka sorkar thaiñ “ban kiar na ka jingpynjur shuh shuh, ban burom ïa ki hok ba kongsan jong ki briew bad ban aiti ha ki jingïakren kiba shisha bad kiba kynthup lang ïa baroh.” Ka HRCP ka la pynbna ruh ban phah kloi katba lah ïa ka kynhun wad bniah ïa ka jinglong jingman.
