New Delhi, Jylliew:
Katkum ki khubor, la ong ba ka ri Bilat, Canada, France bad Norway ki la pynbna ïa ki kyndon pyrkhing ba thymmai ha ka Sngi Ba-ar, pyrshah ïa ki network jong ka Israel kiba donkti ha kaba ai pisa, pynlah bad pynlong ïa ki kam thombor ha West Bank ba la bat da ka Israel.
Kane ka jingleh ka long hadien ka jingjur jong ka jingshah thombor jong ki nongshong shnong Israel, kaba ki nongmihkhmat ki ong ba ka dei ka jingthmu ban pynthut ïa ka jingkyrmen ban ïoh ïa ka ri Palestine.
Da ki spah hajar ngut ki nong Israel ki la shong la sah hapdeng ki million ngut ki nong Palestine ha ki jaka ba ka Israel ka la ioh kurup ha ka thma jong u snem 1967. La jan baroh ki ri bad ki kynhun jong ka UN ki shim ba kum kine ki jaka shong jaka sah ki long ka jingpynkheiñ ïa ka aiñ jong ka pyrthei, watla ka Israel ka ïaleh pyrshah ïa kane, da kaba kdew ïa ki jingïadei jong ka histori bad ka Baibl bad ka ri.
Kitei ki sienjam jong kitei ki saw tylli ki ri, ki dei kiba la pyniadei bad ki jingpynjari kiba la dep pynbna ha ka taiew ba ladep da ka Australia bad ka New Zealand, kaba pynpaw ïa ka jingbitar ha kiba bun ki ri sepngi, ïa ka sorkar jong u Myntri Rangbahduh ka Ri, u Benjamin Netanyahu, kaba la pynheh ïa ki jaka shong jaka sah.
Ka jingpynbna ba ïatreilang da ki myntri bar ri na ki saw tylli ki ri bad kumjuh ruh na ka Australia ka la ong ba ki sienjam ki thmu ban “pynngat ïa ki nongshong shnong kiba leh donbor ban kitkhlieh na ka bynta ki kyrdan kiba shyrkhei jong ka jingshah thombor jong ki nongshong shnong pyrshah ïa ki riew paidbah jong ka Palestine”.
Ka tnat bar ri jong ka Israel, ka la kyntait ïa kitei ki lad, bad ka la ong ba ki sorkar kiba pynjari ïa ki, kim shym la lah ban tehlakam ïa ka jing pyrshah ïa ki Jiw bad ki pynkhluit ïa ka da kum kine ki jingpynjari.
“Ka jinglong bashisha jong kine ki sienjam ka long ka jingpyrshang ban pynbor ïa ka nongrim saiñ hima sima ha kaba ïadei bad ka hok jong ki Jiw ban shong ban sah ha ka Ri Israel bad ha kaba ïadei bad ka jingïakynad hapdeng Israel bad Palestine – ba la pynjah burom kum ki lad pyrshah ïa ka jingshah thombor,” la ong ka kyrwoh.
U Yisrael Ganz, uba dei u khlieh duh jong ka Yesha Council, kaba mihkhmat ïa ki municipal council jong ki jaka shong jaka sah jong ki Jiw ha West Bank, u la ong haba jubab ïa ki jingpynjari kyndon ba ka parliament jong ka Israel ka dei ban pynpra noh ïa ka Bor Palestine bad ban pynkhlaiñ ïa ka jingdon bad ka jingsynshar jong ka Israel ha baroh kawei ka West Bank.
Ka sorkar Israel ka la kam ba ka jingthombor jong ki nongshong shnong ka ju jia bad teng teng ka la pynrem ïa kane, katba ka pyrshah ruh ïa ki jingpynshitom jong ki bar ri ïa ki nong Israel bad ki kynhun kiba ïadei bad ka West Bank, ha kaba ka ong ba ki Jiw ki don ka hok ban im.
