UK, Jylliew:
Ha kane ka jingjia ba sngew shyrkhei, kaba la jia ha ka jaka ri mrad ‘Johnsons of Old Hurst’ kaba don hapoh Huntingdon, la ong ba uwei u khynnah uba dang 3 snem ka rta, u la shah iehnoh ha ka jingiakhun ban pyllait im ïalade hadien ba la suba ba u la shah bret dusmon sha ka liang ba don ki kuratia, da uwei u briew bym don jingithuh.
Katkum ka khubor jong ka The Independent, une u khynnah u la mynsaw jur ha katei ka jingshah thombor, kaba la pynlong ïa ka Tracey Johnson, ka kurim jong u trai jong katei ka zoo, ban leit iarap mardor bad leh shlur, kaba la mareh mar-mar ban leit rung rung shapoh ka kynroh ba la set ïa kitei ki mrad kuratia ban pyllait im ïa utei u khyllung.
Ki pulit ki la iathuh ba ïa utei u khynnah la pynkit mar- mar sha ka Addenbrooke’s Hospital kaba don ha Cambridge, ha kaba u dang don hadpeng ka jingshitom kaba jur bha hynrei u la lait na ki jingma kiba khraw.
La ong ba ki nongtrei ka kynhun ai jingïarap kyrkieh bad ki ophisar katei ka thaiñ, ki la sahkut ha katei ka zoo da ki bun kynta hadien jong katei ka jingjia katba ki jingtohkit ki dang iaid shakhmat.
U nongaiktien jong u Johnsons na Old Hurst u la phah ïa ka khubor sngewlem bad ka jingkitbok- kitrwiang ba ki jingduwai jong ki dkhot katei ka zoo kin don ryngkat bad utei u khynnah lem bad ka ïing- ka sem jong u.
U Detective Inspector Verity McCann jong ki Pulit jong ka Cambridgeshire u la ong: “Ha kane ka por, ngi dang ïakren bad ki briew kiba don ha katei ka jaka ri mrad ha ka por ba jia kane ka jingjia kaba pynsngewsih ban sngewthuh kham bniah shaphang ki jinglong jingman.
“Ngim ngeit ba u briew uba la shah kem bad u khynnah ki iatip iwei ïa iwei pat. Ki ophisar ki kyrshan ïa ka iing ka sem jong u khynnah ha hospital, bad ki jingpyrkhat jong ngi ki dang sah bad ki.”
U MP jong ka Huntingdon, u Ben Obese-Jecty, ula pynpaw ruh ïa ka jingsngewkhia jongu, da kaba ong, “ki jingpyrkhat jongu, ki don bad utei u samla uba la shah pynïap bad ka ïing ka sem jongu, ha ka por ba sngewsih bad ba shitom bha.” U la kyntu ïa ki paidbah ba ki dei ban kiar na ka jingshukor online.
U la bynrap ruh ba u dang “iadei bad ki heh ophisar ha Gold Command, kiba khein ïa kane kum ka jingjia kaba shyrkhei.”
