Beijing, Naitung:
Ha kane ka khubor, la ong ba katei ka nong China, kaba dei na ka thaiñ Yunnan, ka la ioh kem pang ïalade katba ka dang pyrshang ban kjit ïa ka bih na ka kti jong u kurim jongka, uba la shah puh ha utei u bseiñ.
Kane ka la jia ha ka thaiñ Yuan Yang, jong ka Honghe, ha kaba utei u kurim jong katei ka briew, u dang treikam ha lyngkha, ha ka por ba kynsan uwei u bseiñ u la puh ïa u na ki bynta jong ka kti bad la ong ba tang mar kumta hi, u la king-baiong bad u la kynroi prie bad u la khie tlot hangta.
Katei ka kurim jong u pat kaba la sngew kulmar, kam don lad shuh ban leh kumno- kumno ruh namar ba u kurim jongka u la tlot kum ban duh mynsiem noh bad kumta ka la kjit da ka ktien ïa katei ka bih kaba don ha ka kti jong utei u kurim jongka, da kaba ngeit skhem ruh ban leh ïa kajuh hi kumba ki ju pyni ha ki TV bad ha ki phlim. Hynrei la ong ba kane ka jingleh jongka, ka la wanrah jingma pynban wat ïa ka jingim jongka, ha kaba, ka la ioh kem pang pynban ïalade hadien ba ka la sngewthuh ïa ka jingrben ka shyntur bad thylliej jongka hadien ba ka la dep kjit ïa katei ka bih na ka kti u kurim jongka.
La ong ba kata ka jingktah, ka la sdang hiar sha ka dur khmat bad shaduh ki sla kjat jongka bad ha ka sngi kaba bud, ka la ktha bad pang lut ka met- ka phad kumba ju ioh ïa ka jingpang ‘flue’ bad kane ka la pynlong ïa ki bahaiing jongka ba kin pynkit noh ïa ka mar-mar sha jakasumar bad ban phah peit-bniah, ha kaba, la lap ba dei katei ka bih bseiñ kaba la ktah ïa ka naduh katei hi ka sngi ba ka kjit da ka shyntur jongka ban biah noh ïa ka bih kaba rung ha ka kti jong u kurim jongka.
Hadien katto- katne sngi, la ong ba ka jinglong jingman jong ka met jongki baroh arngut ka la kham biang bad ki doktor ki la pyllait noh ïa baroh arngut shi kurim ba kin leitphai iing noh.
Kumta, la ong ba ki doktor bad ki nongpule bniah, ki la maham ba ka jingkjit ïa ka bih bseiñ da ka shyntur bad ban pyndei ha u thylliej ne ban kbum ha ktien, ka long ka jingma kaba khraw bad ka lahb an ktah ïa ki nongleh haba kim don ïa ka jingtip kaba biang.
