Venezuela, Naitung:
Katkum ki kaiphod ba la ioh lum da k tnat ka koit ka khiah jong ka Venezuela, la ong ba ka jingdon kiba khlad na u jumai bah ha katei ka ri ka la kiew sha ka 3,342 ngut ha ka Sngi U Blei, ha kaba ki bor pyniaid jong katei ka ri, ki la hap ban shu tep noh ïa ki metiap jong kito kiba ym don nongwan kam wat hadien ba la buh ïa ka met jongki haduh 11 sngi hadien utei u jumai.
La ong ba kitei ki arsien khynñiuh jumai ba jur ha ka 24 tarik u Jylliew, ki long ki jingjia ba shyrkhei tam ba katei ka ri ka la ioh mad na baroh shi katta ki snem ba ki la ju sakhi ïa kum kine ki jingjia.
Katba ki kynhun pynlait im jong ki ri ka pyrthei ki dang pynkhreh bad pynkut noh ïa ki jingpyrshang ban wad ïa kiba lait im, ka jingpyrkhat ka la kylla sha ka jingsngewsih ïa kito kiba la jah bad la pyndep ïa ka jingtep donburom ïa ka met jong baroh kito kiba ngat ha utei u jumai bah ba shyrkhei.
Ha kawei ka jaka ba kyrpang jong ka lum jingtep jong ka La Esperanza ha La Guaira, ki nongtih jingtep ki la tep ïa palat 150 tylli ki met ïap kiba dang sahteng ban ithuh naduh ki jingkhynñiuh jumai.
Ka laiñ jong ki diengphna lieh kiba suk bad ki syntiew rit ha kjat jong ki ka pyni ïa ka laiñ kaba jrong jong ki jingtep shimet shimet. Uwei pa uwei u don kajuh ka tarik iap: ka 24 tarik u Jylliew, 2026.
Katkum ka jingkheiñ ba la pynthymmai ha ka Sngi U Blei, ym duna ïa ka 3,342 ngut ki briew ki la ïap bad 16,700 ngut pat kiba la ngat bad mynsaw baroh.
Da kaba jan 200 tylli ki jingtei ki la twa lut, kiba bun na ki ha La Guaira, palat 17,000 ngut ki briew ki la hap shong khlem ïing- khlem sem bad ki thiah ha ki jaka rieh bad ki jaka sah ba shipor ba la buh da ka sorkar Venezuela.
Ka sorkar kam shym la ai kano kano ka jingkheiñ ïa kito kiba dang jah rngai, hynrei ka UN ka la buh jingkheiñ antad ba palat 50,000 ngut ki briew ki lah ban dang sah khlem lap hadien ki jingkulmar na utei u jumai bah uba la wan lynshop ïa katei ka ri ha une u snem. Don bun ruh ki longïing kiba dang pyrshang ban wad ïa ki bahaïing hasem jongki, kiba la ngat bad jah rngai naduh ba jia katei ka jingjia ba sniewbok.
