Shillong, Naitung 28
Ka kynhun ïalehkai Mixed Martial Arts ka Jylla ka la lah ban pynpaw ïa ka jingtbit ha ka MMA India National Championship kaba la kut dangshen, ha kaba ka la lah ban khur 7 tylli ki takma.
Kine ki kynthup ïa kawei ka takma ksiar, ar ki rupa lem bad saw tylli ki takma rnong. Ïa kane ka lympung la pynlong ha Abhay Prashal Sports Club kaba ha Indore, Madhya Pradesh.
Ha kane ka lympung la wan shim bynta da palat 500 ngut ki nongshim bynta kiba la mih-khmat na ki 25 tylli na kylleng ki jylla jong ka ri kiba hapoh ka jingkhmih da ka MMA India.
Ïa katei ka takma ksiar la khur da u Leonard T. Nongspung ha kaba u la lah ban ïalehkai bha naduh kaba sdang bad ban khur syndon ïa ka jingjop. Ïa ki takma rupa la khur da u Mehisdashan L. Hujon bad u Kyrshanborlang Kharsohnoh, katba u Jeff Gary Diengdoh, Lee Dieng -doh, Samarjit Jamatia bad u Jesaiah B. Laloo ki la khur ïa ki takma rnong.
Na ka liang ka Megha -laya Mixed Martial Arts Association (MMMAA) ka la leit shim bynta ha katei ka lympung ryngkat ki 17 ngut kiba kynthup ïa 14 ngut ki nongïalehkai, uwei u coach bad ar ngut ki ‘official’.
Lyngba kane ka jinglah ban ïalehkai bha kane ka kynhun, ka pyni ïa ka jingkiew ka Jylla ha ka jingïalehkai Mixed Martial Arts ha kaba la khmih lynti ba kin nangkiew shaphrang ym tang hapoh ka ri, hynrei wat shabar ri ruh kumjuh.
Te kumta na ka liang ka synjuk ïalehkai jong ka MMMAA ka la pynpaw ka jingsngew sarong halor kane ka jingjop ki nongïalehkai ha katei ka lympung bad kane ka pyni ïa ka mynsiem ïakhun ki nongïalehkai ka Jylla pyrshah ïa ki nongïalehkai kiba kynsai na kylleng jong ka ri.
