Shillong, Naitung 29
Ka Shillong Lajong FC ka la pynliem noh ïa ka Nangkiew Irat FC da 1-0 kol na ka bynta ban khur ïa ka jingjop kaba nyngkong ha ka Shillong Premier League 2026 ba la pynïaid da ka Shillong Sports Association ha ka sngi Palei ha SSA Stadium, Polo.
Ka jingïakhun hapdeng kine ki ar kynhun ka la don la ki jong ki khana ha ka rukom ïalehkai, ha kaba ha ka kylla step ka Lajong ka la lah ban ïalehkai bha bad ka la ïoh ban pynkhih jar nyngkong lyngba u Deibormame Tongper ha ka minit kaba 37. Katba ha ka kylla miet ka Nangkiew Irat ka la lah ban ïakhun tyngeh, hynrei haduh kaba kut kam shym la lah ban pynphai.
Kane ka jingjop kaba tang da shi kol, kan dei kaba lai ha kane ka lympung ïalehkai mynta ka samoi, kaba kren shai kdar ba haduh katno ka SPL mynta ka samoi ka long ba jan manla ki kynhun kiba ïakhun ki long kiba la pynkhreh bad ba la lah ban pynkhlaiñ ïa la ki kynhun ïalehkai jong ki.
Ka daw kaba pynlong ïa ka Lajong ba kan ïoh thep ïa kane ka shi kol ka dei namar ka jinglah ban tehlakam bha ïa kane ka jingïakhun, hadien ba ki rangïalehkai ‘dien ka Nangkiew kim shim la lah ban pyllait ïa ka bol shabar jong ka jingma, kaba hangne u Deibormame u la ïoh ban shut kham jam ïa ka bol kaba la sam lyngba ïa u rangapkol ka Nangkiew u Surjay Kumar Pariyar.
Hadien kane, na ka liang u coach ka Nangkiew Irat u la sei madan noh da u Wallamsuk Nongkhlaw, u Justerwell Tham bad u rangïalehkai ba ka klob ka la soi u Yhoto Lohe, kaba hangne ka la sdang ban kylla ha ka rukom ïalehkai jong ka Nangkiew naduh kaba sdang ka kylla miet, kaba la lah shisha ban ñion tyngeh ïa ka kut ïalehkai jong ka Lajong.
Ha kum kane ka khyllipmat ba ka Nangkiew ka la ñion bha, u Wallamsuk u la ïoh artylli ki kabu ban pynkhih ïa ka jar kaba u la shu lait salit ban rung sha ka kol.
Hadien kane u Lohe Yhoto u la ïoh ban khyrwit jam bha ïa kawei ka bol kaba la dei beit daiñ ïa ka diengkol bad kumjuh ha ka minit ba 72 u Justerwell u la ïoh ban khyrwit jam bha ïa ka bol kaba sa shisien ka la dei biang daiñ ïa ka dieng kol.
Ban jin da kine ki kabu ksiar ki urlong lehse kan pynlong ïa ka Nangkiew ba kan khur ïa ka nam jop ka jong ka na kane ka jingïakhun.
Da kumta ban pynkut ïa ka khubor na kane ka jingïakhun ka long ba ka jingïa jop ïa rem hapdeng kine ki artylli ki kynhun ba la ïakhun mynta ka sngi ka dei shisha da ka bok ka nusip kaba la don lang ryngkat bad ki.
Ha ka sngi Palei kan dei ka jingïakhun kaba khatduh jong ka kylla ba nyngkong (Rd-1) kan long hapdeng ka Laitkor SC pyrshah ïa ka Mawlai SC kaban long haka por 4 baje janmiet. Ka Mawlai ka dei ka klob kaba la rah arsien ïa ka nam lahduh ha ka samoi 2022 bad 2023 bad kaba wan ba-ar ha ka u 2024, ïa kaba la khmih lynti ba kan long ka jingïakhun ka ban itynnad bha.
