UK, Naitung:
Katkum ka kaiphod jong ka tnat suiñbneng bad ka tnat ka koit ka khiah jong ka pyrthei, la ong ba palat 3,000 ngut ki la shah ktah bad ki la khlad noh namar ka jingjur palat ka jingkhluit ka suiñbneng ha UK ha u bnai Jymmang bad u Jylliew, ong ka khubor na ki heh ka tnat ka koit ka khiah jong ka Britain. Ka UK Health Security Agency (UKHSA) ka la ïathuh ba kumba 2,877 ngut ki briew kiba ïap na ka jingshit ki la ïoh jingtip ha ka por ba ar bnai, kaba buh ïa ka jingïap mynta u snem hajan ka rekod kaba 2,985 ngut kiba ïap na ka jingshit jingkhriat ba la ïoh jingtip ha ka por lyiur jong u snem 2022.
Ki riew shemphang ki la maham ba katei ka jingkheiñ ka lah ban kiew shuh shuh, ha kaba u bnai Nailar, uba ju long uwei na ki bnai uba shit tam man la u snem, u dang hap ban wan ïaid lynti.
Katkum ka khubor jong ka ‘The Metro’, kitei ki jingiap, ki la mih hadien ka jingshit kaba pher bad kaba jur bha kaba la pynlong ïa ka jingshit kaba palat ïa ka 35 degree celcius ha ki bynta jong ka ri. Ka Met Office ka la pynmih katto katne ki jingmaham halor ka jingshit kaba jur bha namar ba ki jinglong jingman ki buh jingma kaba khraw ïa ka koit ka khiah jong ki paidbah.
Ki rangbah kiba la kham san, ki briew kiba don ïa ki jingpang kiba la don lypa bad kiwei kiwei ki kynhun kiba lah ban shah ktah ki dei napdeng kiba la shah ktah jur bha. Ki heh ka tnat ka koit ka khiah ki la ong ba ka jingshah ktah slem ha ka jingshit kaba jur ka lah ban pynsniew ïa ka dohnud, ka sniehdoh bad kiwei kiwei ki jingpang kiba don hapoh jong ka koit ka khiah.
Ki stad saian ki ong ba ka jingkylla ka suinbneng ka pynlong ïa ka jingshit kaba jur bad kaba jur bha, kaba pynkiew ïa ka jingma jong ka jingpang bad jingiap ha ki por ba shit palat.
Ka jingkiew ka jingshit ka la buh jingeh ruh ïa ka NHS, katba ki nongpynlip ding ki la jubab ïa ka jingkiew jong ki jingpluh khlaw bad kiwei kiwei ki jingjia kiba iadei bad ka jingshit ha kylleng ka UK.
Ki bor pyniaid ki kyntu ïa ki briew ban dih um, ban kiar na ki kam kiba eh ha ki por ba shit bha ha ka sngi bad ban ju peit bniah ïa kiba ha iing ha sem kiba la tymmen, ki para marjan bad kiwei kiwei ki briew kiba lah ban shah ktah ha ki por ba shit bha.
Ha kajuh ka por, ha ka jingpynbna ba kyrpang jong ka koit ka khiah paidbah, ka UK Health Security Agency (UKHSA) ka la maham ïa ki nongleit shuti halor ka jingkiew jong ki nongpang cyclosporiasis, ka jingpang ba saphriang kaba lah ban wanrah ïa ka jingpang jyrhoh kaba jur bha. Katkum ka khubor jong ka BBC, la iathuh ba ki don 67ngut kiba ioh ïa katei ka jingpang, naduh u bnai Risaw, ha kaba kiba bun, ki don jingiadei bad ki nongleit nongwan, kiba wanphai na Mexico.
Ka jingpang Cyclosporiasis ka mih na u khniang uba ki khot u Cyclospora, uba lah ban pynsniew ïa ki jingbam kum ki salad, ki kynbat bad ki soh kiba jem. Ki riew shemphang ki ong ba une u khniang jingpang um ju mih hi ha UK bad um lah ban saphriang na uwei u briew sha uwei pat.
Hapdeng ka 30 tarik u Iaiong bad ka 15 tarik u Naitung 2026, ka UKHSA ka la ïoh jingkheiñ 30 ngut ha England, 27 ngut ha Scotland bad 10 ngut ha Wales. Kane ka jingmaham ka wan ha ka por ba ka America ka dang ïakhun pyrshah ïa ka jingpang ba kyrpang kaba la ktah ïa palat 18 hajar ngut ki briew ha kylleng ki 45 tylli ki jylla, watla ym shym la don mano mano ba ïap.
