Washington, Nailar:
U President ka US, u Donald Trump, ha kane ka kynti u la pynksan biang ba ka jingiadei hapdeng jong u bad u nongialam ka North Korea- u Kim Jong Un, ka long kaba skhem haduh katta bad u la ong ruh ba ka jingkyrshan jong Kim, ka la iarap ïa ka US bad ki paralok jongka ban lait na ki jingma.
“Nga don shisha ka jingiadei kaba biang bad u Kim Jong Un, kumba phi tip, phi la iohi. Um sngewtynnad ïa u Biden, um sngewtynnad ïa u Obama, um sngewtynnad iano- iano ruh, hynrei u sngewtynnad ïa nga, bad nga biang bha ka jingiadei bad u,” la ong u Trump ha ki nongthoh khubor ha ka iing White House.
“Ngi la dep ioh ïa ki jingiakynduh lang kiba khraw, ngi la ioh ban iakren. Bad nga tharai ka ri jongngi bad nga tharai kiwei ruh ki ri, la ka long ka Japan ne South Korea, ki dang kham shong shngaiñ haba nga long manga u President jong ka ri, ban ïa kiwei pat ki nongialam”, la ong u Trump.
U Trump u la ong ba um sngewbha ïa ki jingpynkilan shipai bad ka South Korea katba u dang pynneh ïa ka jingïadei kaba bha bad u Kim, da kaba ong ba ki jingïalehkai ki long ki bym ïahap.
“Ngam shym la sngewtynnad ïa ka jingshisha ba ngi leh ïa kine ki jingpynkilan shipai pyrshah ïa ka North Korea. Ka dei ka jingïalehkai pyrshah ïa ka North Korea haba nga ïalong paralok bad u,” ong u Trump.
U Trump u la ong ruh ba um sngewtynnad ïa ka jingkyntait jong ka South Korea ban ïarap ïa ka US halor ka jinglong jingman ha ka Strait of Hormuz, da kaba kdew ba kane ka ri ka ïoh ïa ka bynta kaba kongsan jong ka jingpynpoi umphniang jong ka lyngba ka lynti um kaba donkam bha.
“Ngam shym la sngewbha haba ka South Korea ka la ong em; kim sngewtynnad ban iarap ïa ngi ha ka duriaw Hormuz, bad watla katta ki ioh 60% na ka umphniang jong ki na ka wah Hormuz. Nga la ong, ‘Hato phi kwah ban iarap ïa ngi?’ U la ong, ‘Em, khublei shibun.’ Te nga la ong, ‘Kata ka long kaba bha, khublei U la pynmih pisa shibun ïa ngi.’ Bad ngam sngewtynnad satia ïa kata.
Kane ka jingkren jong u Trump ka long hadien ba u la pyntikna ba u khmih lynti ban jioh ïakynduh markhmat bad u Kim Jong Un ha kaba kut jong une u snem.
Kham mynshwa, haba kylli ïa u halor ka jingïakynduh kaba lah ban jia hapdeng jong u bad u nongïalam ka North Korea, u Trump u la ong, “Em, ngan sa long. Ngan sa leh ïa kane ruh.”
