D H Kharkongor
Ha kine ki taiew kiba dang shu dep nga poi ban kylli ïalade – Hato kane ka ïa ka jong u ‘Piskot’ kan shu kut noh ha ka jingshongsuk ka shongshngain jong ka Shillong hi baroh kawei, kata, khlem kano kano ruh ka ‘huri-hura’? Phewse kam long kumta hynrei kumba ka ju long man la ka snem. Ka ‘huri- hura’ kam ju lait ha kum kane ka por lane ha kum kane ka ïa ka jong u Piskot. Ka ïa kaba ka ‘jingpang lamwir’ ka ju khie kynsan kynsan ha ki ‘khunsamla’ kiba ‘alhia’, kata, kiba ka ‘pule puthi’ ruh em ka ‘bylla ka sngi’ lane ka kamai kajih ruh em. Ki ‘khunsamla’ kiba ym tang ka ‘imlang- sahlang’ hi baroh kawei hynrei wat haduh ki kmie ki kpa ki jong ki hi ruh ki lah duh jingkyrmen. Ki ‘khunsamla’ kiba imat kumba kim pat peitphang ia ka ‘jingmut’ (meaning) jong kane ka jingim, kaba hangne ha slapyrthei. Kiba imat kumba ki shu ‘im’ khlem kano kano ka jingthmu’ (purpose). Ngam lah khlem da rymmuiñ wei ba ka ‘hurihura’ kam lait.
Tangba ym lah shisha khlem da sngewsynnei ïa ki ‘alhia’ naba ki da dei shisha pat ruh kita ki ‘desperados’. Kum ban shu ong noh kiba mynsngi mynshai ki lynga ki pisa da kumno ba kan poi noh ka mied ka ïong katba ynda mynmied myniong pat de ki angnud ban poi noh ka step bad ka jingshai. Ki bapli kiba la kum pynbijai ei ïa la ka jong ka jingim. Ki bapli kiba ïasyriem pynban ïa u ‘pui-pui’ uba shupoi wir katsha ba rong ka lyer. Ki bapli kiba ym lah ban ‘suhthied’, kat ban seisoh, la hangno hangno ruh. Ki bapli kiba ym shemphang ba ki lah shah pynsngewthuh bakla, shah ïalam bakla bad shah pyndonkam bakla, ha ki ‘Nonghikai’ jong ka ‘Skul Surok’. Ki bapli ki bym shemphang ba ki dei tang ki ‘diengbyllan’ bad ruh ki ‘ksewwiar’ jong ki ‘Nonghikai jong ka Skul Surok’. Ym lah shisha khlem da sngewsynnei ïa ki bapli ki ‘Zero’ kiba kum pyrkhat ïalade ba ki dei ki ‘Hero’. Ki bapli kiba da ïasyriem shisha ruh thik kum kita ki ‘Jakoid’ kiba thik tang ha la I jong I pung iba rit.
Kane ka Sorkar pat ruh ka lah bakla shaba palat liam ba ka ai jingbit kumto wat ïa ki ‘Khynnah Skul Surok’ ba kin ïa ïaid rally kumto da ki ‘motorbike’. Ki ‘Khynnah Skul Surok’ kiba lah thika ba ynda kin poi Sor Shillong, ha kaba kin iohlad ban ïakynduhlang bad kiba kum ki, kin sa shah lynshop tyngeh ha jingpang ‘lamwir’. Ki ‘Khynnah Skul Surok’ kiba ju brai tang lano kan poi noh ka ‘Kabu ksiar’ ïa kiba kin ioh kiew kyrpang sha Sor Shillong, shisien shisnem, na ka bynta ban ïaleh ‘lamwir lamtham’. Ka ‘jinglamwir’ kam ju lait, wei haba khie wahleng ki ‘Khynnah Skul Surok’ ba kumta ka Sorkar ka lah dei ban pynbiang bad pynkhreh lypa, ha shilynter ka lynti ïaid ‘rally’ ka jong ki (khynnahsurok) ïa ki bor pulit pahara kiba kyrpang. Ki ‘pulit kyrpang’ kiba dei ban leh da kaba ‘tyngeh’ bad ruh kat kum ka Aiñ, ïa kat kiba leh tam.
Lah ban ong ba kato ka ‘huri hura’ kam dei kaba shu jia ryngkat hangno hangto hi hynrei kaba ki ‘Khynnah Skul Surok’ ki lah da thmu lypa bad ki lah da pynkhrehlypa hi ruh. Kato ka rukom kaba ki kah ïa la ki jong ki durkhmat ki jong ki bad khamtam eh kato ka rukom kaba ki ïaleh bah buhrieh ïa ka ‘Number Plate’ ka jong ki ‘bike’ ki jong ki ka kdew shaikdar ba ki lah don lypa ïa ka jingthmu kaba sniew. Tang na kato ka rukom leh ka jong ki shwa ruh ba lah ban ong ba ki dei kiba lah ‘budnamteng’ lane kiba lah ju shah kem teng. Lah ban ong ba ki dei ki ‘riewthrangsnam’ kiba lah ‘shongtyrut ka kti’. Ki dei ki ‘riewthrangsnam’, kiba lah don lypa ïa ka jingthmu ban ‘pynhurihura’ lym kumta kin nym pynkhreh kypang kat ban rah kyrpang ïa kum kito ki tiar pynmynsaw. Ki don napdeng jong ki kiba da rah buhrieh syndon da u ‘tyrnemrit’ na ka bynta ban tangon tyngeh na ka ‘maloikhlieh’ ïa une utai, uba ki iohlad.
To ñiuma phi don ka hok ban pynpaw pyrshah ïa kat kaba phi sngewdei ban pyrshah. To leh ïa ka da kaba phi deng ‘lama ïong’. To sleh syndon ruh i ïalade, baroh shirynñieng, da ka ‘rongïong’ lane da ka rongsurok (Bitumen). To shong shah jingit ruh tad haduh phin da sah satang ka shyieng bad ka syep. Tangba ym dei bad ym bit pat de ba phin ïapynthut ïa ka ‘shongsuk ka shongsaiñ’. Ym bit bad ym dei ban pynthut ïa ka leit ka wan bad ïa ka khaiï ka pateng. Ym bit ban pyntieng pynsmiej (inti-midate) lane pynrit mynsiem ria ïa ka bapli ka kynthei ka khynnah. Ym bit ruh de ban pynjot pynjulor (vandalise) ïa ki mar ki mata ki jong u paidbah. Kaba katno tam ban rah kti rah kjat(assault) lane shoh pynmynsaw ïa kiba luilui.
Kato kaba phi leh shongshit biej bad lehsarong biej kumto ka pynshisha ba phim dei ki ‘Riewshlur ba dap shynrang’ hynrei ki ‘khawpud’. Ki ‘Khawpud’ kiba shlan tang ynda ïabun paid bad shlan pat de ruh tang ïa kiba rit kiba ria. Kumta ynnai sarong naba phim dei kita ki ‘Khlur Ka Ri’ hynrei ki ‘Kainiong’ kiba pynthoh bria pynban naduh ïalade, ïa la ka jong ka ïing ka sem, ïa la ka jong ka dong lane ka kyntoit bad haduh ïa ka ‘Jaitbynriew Khasi’ hi baroh kawei. Kato kam dei ka kam jong ki ‘Hero’ hynrei ka kam shongshit biej jong ki ‘Zero’.
