Syria, Nailar:
U President jong ka Syria, u Ahmed al-Sharaa, u la thung ïa u nongïalam jong ki Kurd, u Mazloum Abdi, kum u nongai jingmut jong u, ong ki lad pathai khubor jong ka sorkar ha ka Sngi Thohdieng, hadien katto- katne sngi, ba u Abdi, u la pynbna ban pynduh noh ïa ki shipai Kurd jong u, hapoh ka jingïateh kular bad ka Damascus.
“Naduh kane ka sngi, la thung ïa u Mustafa Khalil Abdi kum u nongai jingmut jong u President jong ka ri”, la pynbna ïa katei ka hukum, kaba la soi da u Sharaa bad kaba la pynmih da ka tnat pathai khubor jong ka nongbah.
U Abdi, uba la tip da ki katto katne ki kyrteng bapher bapher, u la long la bun snem kum u nongialam jong ka Syrian Democratic Forces (SDF) ba la ialam da ki Kurdish, ka kynhun ba la kyrshan da ka America, kaba don ha khmat eh ha ka jingiakhun pyrshah ïa ka kynhun lehnoh Islamic State.
Ha ka Sngi Ba-ar, u la pynbna ïa ka jingpynduh noh ïa ka SDF, shi bynta na ka jingiateh kaba u la iasoi bad ka Sharaa ha u bnai Jymmang ban pyniasoh ïa ki shipai jong ki Kurd bad ka jingsynshar riew paidbah ha kane ka jylla.
Ki bor synshar Islamist ba thymmai jong ka Syria kiba la pynhap noh ïa u nongsynshar ba la slem bha u Bashar al-Assad ha u Nohprah 2024 ki la
wad ban pyniar ïa ka jingsynshar jylla ha baroh kawei ka ri.
Ka jingiateh ban pyniasoh ka dei ka jingjop kaba khraw ïa ka Sharaa hynrei ka jingpynkut ïa ka jingkyrmen jong ki Kurd kaba la slem bha ban ioh ïa ka jingsynshar hi.
U nongmihkhmat ba kyrpang jong ka US sha Syria u Tom Barrack u la ong ha ka sngi Balang ba “kane ka long kumno ka jingpyniasoh bashisha ka long… ki paralok barim kiba don ki jingmut bapher bapher ki shna ïa ka lad pynbeit ryntih ban pynkhlain ïa ka jaitbynriew ba synshar hi jong ka Syria”.
“Ka jingpynthikna ïa ki bynta kiba kongsan na ka bynta ki paralok ba kordor jong ngi” kynthup ïa u Abdi hapoh ka sorkar “ka ai burom ïa ka jinglong nongïalam jong ki, ïa ki jingaiti jong ki paralok Kurdish jong ngi, bad ïa ka jingnoh synñiang kaba tei kaba ki la ai sha ka jingshong suk shongsaiñ ha ka thaiñ”, la bynrap biang u Barrack, khlem da pynpaw ïa ka bynta aiu u Abdi u dei ban don.
U Abdi u la ong ha ka sngi Balang ba ka jingpynduh noh ïa ka SDF ka la long hadien “ka jingpyndep ïa ka jingpyniasoh ïa ki shipai jong ngi sha ki brigade jong ka kynhun shipai Syria”.
Katei ka SDF, ka dei kaba la thaw ha u snem 2015, da ka jingpynshit jong ka ri America, kaba la sngewtynnad ïa ki ehrang Kurdish, kiba la pynliem ïa ka IS, ha Kobane ha ka thain shatei lam mihngi bad kaba dang wad ïa u paralok, uba lah ban shaniah, ha ka jingialeh pyrshah ïa ki lehnoh jihadist, kaba dang iaid shakhmat.
