Washington, Nailar:
Katkum ki khubor, la ong ba ka Google ka la pynkylla kyrteng thymmai ïa ka Nan Ontario kum ka “Lake America” ha ki map ba la ïohi da ki nongpyndonkam jong ka US ha ka Sngi U Blei hadien ba u President Donald Trump u la pynbna ba un pynkylla kyrteng ïa ka um, ha kaba uwei u heh jong ka Canada u la kynthoh ïa ka jingïakynad hapdeng ki khappud kum “ka jingphaidien shisyndon.”
Katba la ong pat ba ki paidbah ka Canada kin dang ïohi hi ïa katei ka Nan Ontario, da ka kyrteng kaba mih na ki riewlum ba la pyndonkam na ka bynta kane ka nan naduh ka spah snem kaba 17, ha ki tiar bad ki kor kompiwtor jongki, ong kane ka kompeni heh jong ka Tech kaba don ha US.
Ka jingïakynad halor ka kyrteng ka la long ka bynta ba khatduh eh jong ka jingïathuhkhana jong u Trump “America First”, ha kaba ki paralok ba la slem bha ka America bad ka Canada ki la pynjur ïa ka thma khaii pateng kaba la pynlong ïa ka Washington bad ka Ottawa ban pynïoh khajna mar kylliang iwei ïa iwei pat.
Ka Maps app jong ka Apple kaba wan buh ha baroh ki iPhone kam shym la kdew satia ïa ka “Lake America” ha ki map jong ka haduh ka step Sngi U Blei.
Ka Google ka la ong ba ka la pynlong ïa ka jingkylla jong ka katkum ka US Geographical Names Information System (GNIS), ka jaka buh jingtip ba thikna jong ka sorkar pdeng na ka bynta ki kyrteng jaka.
“Naduh ba ngi pynthymmai ïa ka Google Maps ban pyni ïa ka jingkylla kyrteng ha ki tyllong khubor ba thikna jong ka sorkar, kaba dei ka GNIS na ka bynta ka US, ki briew kiba pyndonkam ïa ki Maps ha US kin iohi ïa ka ‘Lake America,’ kiba ha Canada kin dang iai bteng ban iohi ïa ka ‘Lake Ontario,’ bad kiba shabar jong ka US bad Canada kin iohi ïa baroh ar tylli ki kyrteng,” la ong ka Google ha ka blog jong ka.
Kane ka jingkylla ka pyni ïa ka jingpynkylla shiliang jong u Trump ïa ka kyrteng jong ka Gulf of Mexico sha ka Gulf of America ha u Kyllalyngkot 2025 – ka jingleh kaba ka Mexico ruh ka la kyntait.
Ka Ontario ka long kaba rit tam katkum ka jingheh jong ka khyndew na ki phra tylli ki nan bah, kiba don ha u pud u sam jong ka Canada bad ka US hapdeng ka jylla Ontario bad ka jylla New York jong ka US.
U myntri rangbahduh jong katei ka jylla, U Doug Ford, u la tyrwa ïa ka jingkynthoh kaba thymmai ha ka Sngi U Blei, halor ka jingiakynad ha ka khaii pateng bad ka jingkylla kyrteng jong ka nan jong u Trump.
“Ka long shisha kaba phaidien. Ka la long kum kaei kaei kaba mih na (ka jingpyni TV jong ka US) ‘Saturday Night Live’ haba u la soi ïa ka kot kaba ong — la pynkylla sha ka ‘Lake America’. Ym don mano mano ruh ban khot ïa ka ka nan jong ka America”, la ong u Ford ha ka prokram iakren jong ka ABC “Ha kane ka taiew.”
