Shillong, Nailur 02
Ka lympung ïalehkai Shillong Premier League ka la nangjam shaphrang ha kaba ka Mawlai SC ka la pynliem noh ïa ka Nongkseh SSCC da 1-0 kol bad ka Langsning FC ka la jop da 6-1 kol pyrshah ïa ka Laitkor SC.
Ïa ka shi kol ba kordor tam jong ka Mawlai SC ka la wan lyngba ka free-kick ha ka por ba la pynjlan artad ïa ka por ïalehkai, ha kaba u Damanbhalang Chyne (90’+5), u la lah ban pynkhun ïa ka bol na kyndong ban pynkhih jar.
Katba na ka liang ka Nongkseh SSCC ka wan rung sha kane ka jingïakhun hadien ba ka dang shu dep mad ïa ka jingshah rem da 1-0 kol ha ka Shillong Lajong FC.
Ka jingïakhun hapdeng kine ki ar kynhun ka long ba ki la ïalehkai bha, kaba na ka por sha ka por la mih paw ruh ki kabu ksiar ban ïa pynkhih jar, hynrei ka jinglong ba phikir bad peitngor bha ka jong ki rangïalehkai ha madan, ka la tem noh ïa ka jingshah thep kol.
Hynrei ha ki minit hashwa ba ka jingïakhun kan jam noh sha kaba kut, ka Mawlai ka la ïoh ïa ka kabu ksiar ba paka da kaba la ïoh ïa ka free-kick, kaba hangne u Damanbhalang thik kumba u la thew ka la rung beit sha kol bad kane ka la pynang lyngngoh ïa ki rangïalehkai ka Nongkseh.
Haba phai pat sha ka kynhun ïalehkai jong ka Langsning, ka jingjop ïa ka Laitkor lah ban ong ba ka la dei lypa naduh ba kut tang ka kylla step, hadien ba ka la lah ban tam lypa haduh saw kol.
U Mebanshngaiñ Kurkalang u la thep ar kol (10′, 12′), katba ïa kiwei pat la thep da u Damonlang Pathaw (45′), Syed Ahmed (45’+4), Samuel L Kynshi (84′) bad u Rohan Manar (90’+4).
Kumban shu pynkynmaw ba kane ka jingïakhun hapdeng kine ki ar kynhun ka dei hadien bym shym la lah ban pynlong ha ka 28 tarik u Nailar namar ka jingther u lapbah.
Na ka liang ka Laitkor ka la pynphai kylla shi kol lyngba u Hamingbert Nongbet (54′) hashwa ba kan mad ïa ka jingshah rem.
Te kumta lyngba kane ka jingjop, ka Mawlai ka la kamai 10 poiñ kaba mar ïa ryngkat bad ka Shillong Lajong, hynrei ka la ïapher ha ka jingthep kol (+7 la +4). Katba ka Langsning ka la don mynta ha ka kyrdan kaba lai bad kamai 9 poiñ, ka Nongkseh ka la hiar sha ka kyrdan ba hynriew bad 4 poiñ, ka Laitkor ka don ha ka kyrdan ba phra bad kamai tang 3 poiñ.
Ha ka sngi Palei, ka Sawmer kan mih madan ban ïakhun pyrshah ïa ka Nangkiew Irat ha ka por 3:40 noh phai sngi.
