Washington, Nailur:
Ka kaiphod ba la ioh lum da ka tnat wad bniah jong ka US, la ong ba ka Russia ka la iarap sop-sop ïa ka Iran ban wanrah ïa ki ‘namding ba khlaiñ bor bad kiba lah ban long ka jingma kaba khraw ïa ki liengsuiñ bad ki jhad thma jong ka US hapoh Middle East.
Kane ka prokram ba rieh, kaba la ai kyrteng code C430L, ka la sdang ban mih dur ha u snem 2023 bad ka pynshong nongrim ha ka teknoloji kaba lah ban ailad ïa ki namding jong ka Iran ban ïaid ha ka jingstet kaba bun shah ïa ka sur.
Ka rukom pynher ïa ka Ramjet ka dei ka buit kaba ka Iran ka la pyrshang ban pynmih la bun snem. Kum kane ka rukom ka lah ban ai ïa ka Tehran ïa u namding uba kham stet bad uba eh ban khanglad, kaba pynlong ïa ki kor ïada suiñ jong ki ri Sepngi ban kham duna ka por ban lap bad ban jubab ïa ka jingshah thombor kaba wan.
Ka jingheh jong ka jingpynkylla ïa ka teknoloji ka pyni ba kane ka prokram kan jin da la donkam ïa ka jingmynjur na ki kyrdan ba ha khlieh duh jong ka sorkar Russia.
Katei ka jingpynbeit, ka i kumba ka iahap bad ka jingiatreilang ha ka kam shipai kaba kham heh hapdeng ka Moscow bad ka Tehran. Ka Iran ka la kyrshan ïa ka prokram drone jong ka Russia, katba ka Russia ka la ai jingiarap na ka bynta ban shna ïa ki namding jong ka Iran.
Ki kot ki sla kiba la mih paidbah kiba la bishar bniah da ka The Financial Times ki pyni ba ki jingpynkhreh na ka bynta ka jingïateh kular jong ka C430L ki la dep ban ïaid shakhmat shwa ban ïasoi pura ïa ka jingïateh kular ha u Naiwieng 2023, tang hadien katto katne taiew hadien ka jingshah thombor ha ka 7 tarik u Risaw.
