Saudi, Risaw:
Uwei u nongshong shnong jong ka Saudi u la khlad noh ha ka jingshah thombor ha ka kad liengsuiñ King Fahd ha Dammam ha ka bynta ba shatei lam mihngi jong ka Saudi Arabia ha Persian Gulf hajan ka Bahrain bad Qatar, la pynbna ka tnat pynïaid liengsuiñ jong ka Saudi ha ka step Sngi Palei.
Ka bor pyniaid liengsuin ka la iathuh ruh ba 8 ngut ki briew ki la mynsaw ha ka jingshah thombor ha ka janmiet Sngi Balang bad ka kad liengsuin ka la mad katto katne ki jingjulor ha ki tiar ki tar. Ka tnat buddien jong ki liengsuiñ ha ka pyrthei, Flightradar24, ka la pynbna ba la phah ïa ki liengsuiñ sha jngai na katei ka kad liengsuiñ.
Ki bor pyniaid kim shym la iathuh mano ba leh ïa katei ka jingshah thombor ne ban ai ïa ki jingtip ba bniah.
Ka kad liengsuiñ jong ka King Fahd ka la shah thombor mynshwa hapdeng ka jingbthei kaba kham heh jong ki namding bad ki namding jong ki Houthi kiba thmu ïa ki kad liengsuiñ kiba heh ha Saudi Arabia.
Ki Houthi kiba la kyrshan da ka Iran kim shym la kren eiei halor kane ka jingthombor. Ka Saudi Coalition ka la pynbna ba ka la khanglad ïa saw tylli ki jinghiar thma da ki drone ha ka thain mihngi.
Ha ka janmiet Sngi Balang, ka US ka la bthah ïa ki katto katne ki nongmihkhmat bad kiba haïing hasem jong ki nongtrei sorkar jong ka US ban mih noh na Saudi Arabia hadien ka jingthombor ba shyrkhei ha katei ka ri da ki lehnoh Houthi jong ka Yemen kiba la kyrshan da ka Iran bad ka jingtieng kaba nang kiew halor ka jingjur jong ki jingïaleh pyrshah.
Kane ka jingshah thombor ba khatduh ka la jia hadien ba ka tnat bor ding jong ka Saudi Arabia ka la ong ba ki tdem na ka drone ba la shah khanglad ki la pyniap ïa arngut ki briew bad pynmynsaw ïa arngut kiwei pat ha kawei ka jaka tih umphniang ba la pynïaid da ka Aramco ha ka thaiñ shatei lam mih ngi jong ka ri.
Ka tnat ka iathuh ba kitei ki arngut kiba la iap ki dei ki nong Nepali bad Philippines, katba kiba mynsaw ki dei ki nong Pakistan bad India.
Ha u bnai ba ladep, ki tdem na ka liengsuiñ Houthi ba la shah khanglad ki la pynïap ïa uwei u nong Yemen uba sah ha Saudi Arabia. Ka dei ka jingshah pyniap kaba nyngkong eh jong ki riew paidbah naduh ba ki Houthi ki la pynjur ïa ki jinghiar thma jong ki pyrshah ïa ka hima, da kaba thmu ïa ki jaka kit lieng bad ki jaka pynmih umphniang jong ka Saudi.
Ha kaba sdang jong une u bnai, ka la bthei ka ding kaba rit ha kawei ka iing synshar ha Aramco, kawei na ki jaka pynmih umphniang kaba heh tam ha ka pyrthei, kaba la shah thombor ha ka jingshah thombor ha ka thain mihngi jong ka Saudi Arabia, la ong ka tnat bor ding ha katei ka por.
