Sydney. Risaw:
Katkum ki khubor la iathuh ba ka la mih ka jing ujor da ka mukotduma hakhmat ka ïingbishar jong ka Australia pyrshah ïa ka Facebook bad Instagram jong ka Meta, da kaba kynnoh ba ki rynsan ‘social media’ ki la pynsaphriang da ki jingtip kiba sniew sha ki khynnah kiba pyndonkam ïa kitei ki jait rynsan paidbah bad ka pynlong ruh ïa ki ban long kyrni lyngba ki rukom bapher ba kitei ki rynsan ki pyni sha ki paidbah.
Katei ka mukotduma, kaba la mudui ha ka Federal Court, kaba long kaba ar ha Australia, kaba la wanrah da ka tnat aiñ MinterEllison, ha une u bnai, ka lah ban dei kaba nyngkong eh ruh hapoh Australia ban pyrshah ïa ki rynsan social media, halor ki jingkynnoh ba ki don jingktah ïa ki nongpyndonkam jongka, khamtam ïa ki khynnah bad ki samla.
Ia kane ka mukotduma class action la mudui na ka bynta ki 8 ngut ki nongmudui, kiba kynnoh ba ki la shah ktah ha ka Meta ha ka por ba ki dang hapoh 18 snem ka rta bad na ka liang kitei ki tnat bad ki bor pyniaid ki la dawa ïa kitei ki rynsan paidbah ba ki dei ban siew ïa ka bai lut ksan.
Tad haduh mynta, la ong ba ka Meta kam shym la jubab mardor halor ka jingkyrpad ban ai jingpynshai haba iadei bad kane ka bynta.
Ha ka hukum ba la pynrem ha ka Sngi Nyngkong, ka iingbishar ka la khang ban pynpaw ïa kino kino ki jingtip kiba lah ban pynpaw ïa ka jinglong jong ki nongmudui bad ka jingpynpaw ïa ki jingdawa.
Ka Meta ha u bnai Nailar, ka la mynjur ban siew $18 billion ban pynbeit halor kitei ki kynrum- kynram bad ki jingshah kynthoh jongka bad ha la baroh ki jylla jong ka US ban pynbeit ïa ki jingkynnoh ba ka la shna ïa ki social media ban pyndih buaid ïa ki khynnah.
Kane ka jingmudui ka wan hapdeng ka jingjur ka jingïakynad hapdeng ka Australia bad ka Big Tech hadien ba la khang nyngkong eh ha ka pyrthei ïa ki social media na ka bynta ki khynnah kiba hapoh 16 snem ka rta, bad ki kyndon ba la tyrwa thymmai kiba lah ban ailad ïa ki nongpyndonkam ban pynlip noh ïa ki jingthoh ba la pynïaid da ka ‘algorithm’ ha ki ‘feed’ jong ki.
