Ankara, Risaw:
Ka sorkar Turkey ka la pan na ka iingdorbar thaw-aiñ ban pynskhem ïa ka jingïateh kular ban ïada markylliang kaba ka la ïasoi bad ka Saudi Arabia bad ka Pakistan, kaba wanrah ïa kane ka ri ban kham jan ban pynkhlaiñ ïa ki lad jingïada jong ka Saudi namar ba ka ïakynduh ïa ki jingshah thombor na ki lehnoh Houthi ba la kyrshan da ka Iran.
Da kaba pyni nuksa ïa ka kyndon 5 jong ka NATO, ka jingiateh ba la khot ka Mecca ka pynbor ïa ki liang ban peit ïa ka jinghiar thma da ki tiar pyrshah ïa uwei kum ka jinghiar thma ïa baroh lai tylli.
Katba ka Turkey ka ong ba ka dang pyrkhat ban phah jingkyrshan shipai sha Saudi Arabia, ki heh sorkar ki la maham ba katei ka jingiateh ka dei kaba iada ha ka jinglong bad ba yn nym don ki shipai Turkey ban leit ialeh ha Yemen lane ban hiar thma ïa ki Houthi.
Ki heh sorkar jong ka Turkey bad Pakistan ruh ki la ban jur ba katei ka jingiateh kam dei pyrshah ïa ka Iran ne kano kano ka ri, hynrei kim pat ong kumno kin leh lada shah thombor ha ka Iran.
Ia kane ka jingiateh la soi ha ka nongbah bakhuid jong ka Saudi Arabia ha Mecca ha u Naiwieng da u Syiem Saudi, u President ka Turkey bad u Myntri Rangbahduh ka Pakistan u Shehbaz Sharif da ka jingthmu ban pynkhlain ïa ka jingiatreilang bad ka jingpynsangeh hapdeng ki lai tylli ki riew shipai kiba heh ha ka thain ha ka por ba ka thma kaba jur bha ha ka Iran.
Ka wanrah lang ïa ka Saudi Arabia kaba riewspah ha ka umphniang bad ka Pakistan kaba don bor nuclear bad kumjuh ruh ïa ka Turkey, kaba don ïa ka kynhun shipai kaba ar ha ka NATO bad ka kam iada ri kaba kiew stet bha. Ka pynlah ïa ki lai ngut ban shim ïa ka jingkitkhlieh kaba kham heh na ka bynta la ka jong ka jingshngain ha ka por ba ka jingdonkti jong ka US ka la duna.
Na ka bynta ka Pakistan, ka Mecca Agreement ka tei halor ki jingïadei shipai kiba la don lypa bad ka Riyadh. Ka Saudi Arabia bad ka Pakistan ki la iasoi ïa ka jingiateh ba kyrpang ban iada markylliang ha u Nailur 2025.
U myntri bar ri jong ka Pakistan, u Ishaq Dar, u la ong bunsien ba ka jingiateh ha Mecca, kam bujli ïa ki jingiateh ba la don lypa bad ka plie lad ïa kiwei pat ki ri, kiba kwah ban bat ïa ki nongrim jong ka bad ban pynbeit ïa ki jingiapher jingmut da kaba suk.
Ha ka jingïalang kyrkieh ha Riyadh ha kaba sdang jong une u bnai, ki lai tylli ki ri ki la mynjur ban pyntreikam mardor ïa kaei kaba ki la ong ba ki dei ki jingkular ïada lang jong ki, kynthup ïa ki jingpynbeit na ka bynta ban phah stet ïa ki bor shipai bad ki jinglah ba la mynjur lang sha Saudi Arabia. Ki khlem batai bniah.
