Tehran, Nailur:
U heh ka tnat ïada jong ka Iran ha ka sngi Balang u la maham ïa ka America halor ka “buit treikam kaba thymmai” na ka Iran ha Middle East hadien ka jing iahiar thma markylliang hapdeng kine ki ar tylli ki ri ha ki taïew ba la dep.
“Hadien kiei- kiei kiba la dep jia baroh, phin ym lah ban lait na ka dujok ding jong ka jingbitar ka Iran kaba phi la pan kwah hi da lade, shen phin sa ïohi ba ka buit thymmai jong ka Iran ha madan thma, ha ka jingïadei bad ha kaba ïakhun pyrshah ïa ka jingkhanglad ha ka liang ka ioh- ka kot, kan pynkhyllem ïa ki nongrim jong phi” la ong u Secretary jong ka tnat ïada ri ba ha khlieh duh jong ka Iran, u Mohsen Re.
U President jong ka America, U Donald Trump, u la ong ba ka America, ka la sdang thymmai ïa ka jinghiar thma kaba heh bad kaba kham jur pyrshah ïa ki thong ba kongsan jong ka Iran, hajan ka duriaw Strait of Hormuz.
Kitei ki jinghiar thma ki long hadien kaei kaba u Trump u la kam ba ka dei kum ka jingpynshitom beiñ halor ka jingpyrshang jong ka Iran ban pyndap ïa ki mawshun ha duriaw ha ka Strait.
“Ka ri America ka dang, kumba ngi kren, ka dang siat ïa ki thong jong ka Iran hajan ka duriaw Hormuz. Ki jinghiar thma ki long kiba heh bad kiba khlain bor, bad kum ka jingpynshitom bein ïa ka jingpyrshang ba khlem urlong jong ki nong Iran ban pynrung ïa ki mawshun ha duriaw ha ka duriaw, kaba mynta kam don mawshun shuh. la pynhap noh, ha ka jaka sah shipai jong ngi ha Jordan,” u la ong.
U Trump u la maham ba kano kano ka jingleh pynrem jong ka Iran na ka bynta kane ka “jingthombor kaba don nongrim” kan iakynduh ïa ka jingshah thombor kaba kham jur bha.
Ka US Central Command, ha ka jingthoh halor ka X, ka la ai ïa ki jingtip ba bniah shaphang ki jinghiar thma bad ong ba ki wan kum ka jingkynthoh ïa ki “jingpyrshang thombor jong ka IRGC” ba dang shen pyrshah ïa ki jhad khaii ha ka Strait of Hormuz bad pyrshah ïa ki dkhot shipai jong ka America kiba la pyntreikam ha katei ka thaiñ.
