New York, Nailur:
Ki heh sorkar jong ka nongbah New York ki la pynbna ban pynsangeh shisnem ïa ki khynnah skul kiba pyndonkam ïa ka jingstad thymmai ha ki skul rit bad ki skul heh paidbah, ka dei ka sienjam kaba khatduh eh da ki heh sorkar ban buh ïa ki kyndon ha kylleng ki kor ki bor thymmai ha ka kamra klas.
Kane ka jingleh jong ka skul distrik kaba heh tam jong ka ri ka dei kaba pyrkhing tam haduh mynta ha kylleng ka US, watla kiwei pat ki distrik, kynthup ïa ka Los Angeles, ki la ong ba ki dang bishar bniah ïa ki polisi jong ka AI.
U Mayor Zohran Mamdani u la ïathuh ha ki nongthoh khubor ha ka sngi thohdieng ba ki skul kin sangeh noh ïa ka jingpyndonkam mynta ïa kumba 40 tylli ki tiar hikai ha ki kamra klas jong ka nongbah New York.
“Ki khynnah ki donkam ïa ki nonghikai bad ka jingïadei para briew khnang ban nang bad ban roi. Ki donkam ban pynroi ïa ki sap ryngkat bad ki paralok jong ki, ban tei ïa ka jingïadei bad ki nonghikai bad ban ïakhun pyrshah ïa ki jingeh kiba eh da lade,” ong u Mamdani ha ka jingïalang bad ki nongthoh khubor.
Ki nongpynmih AI ba heh jong ka Google, Anthropic bad Microsoft kim shym la jubab mardor ïa ki jingkyrpad ban ai jingmut.
Kane ka policy kan ktah ïa kumba 6 lak ngut ki khynnah skul paidbah haduh ka kyrdan kaba phra, katba ki khynnah skul heh kin shah ban pyndonkam ïa ka AI ha ki katto katne ki khep. Yn shah ïa ki nonghikai ban pyndonkam ïa ka AI na ka bynta ka jingthmu jinghikai bad ki kam kum ka jingpynbeit por, la ong ka nongbah ha ka kyrwoh.
Ki skul paidbah jong ka nongbah New York mynshwa ki la pynjari ïa ka jingkhang shipor ïa ka ChatGPT tang hadien ba la pyntreikam ïa ka ha u snem 2022. Hadien la weng noh ïa kane ka jingkhang bad la bujli da u nongïarap hikai ba la shna kyrpang da ka AI, katkum ka jingïathuh jong ka Microsoft, shi bynta trai jong ka OpenAI.
