Shillong, Nailur 06
Ka Sohryngkham SC ka la lah ban pynthikna ban jam sha ka semi final ha ka lympung ïalehkai 2nd Division Football League 2026 ba la pynïaid da ka Shillong Sports Association (SSA), hadien ba ka la pynliem noh ïa ka Umlyngka SC da 1-0 kol ha ka sngi Saitjaiñ ha SSA Stadium, Polo.
Kane ka nam jop ka la wan urlong lyngba u Winstar Kharpran, uba la thep ha ka minit kaba 56.
Ha kane ka jingïakhun quarter final baroh ar ki kynhun ki la pyrshang ban ïalehkai bha naduh kaba sdang ha kaba kim shym la lah ban thep kol ha ka kylla step. Hynrei dei ha ka kylla miet ba u Winstar u la lah ban pynurlong na ka bynta ka Sohryngkham bad ban khur ïa ka jingjop.
Ha ka jingïalehkai quarter final myn ha ka sngi Thohdieng, ka Mawpat SC ka la pynliem noh ïa ka Tynring SC da 6-1 kol na ka bynta ban jam sha ka semi final.
U Donboklang Lyngdoh u la khur ia ka hat-trick hadien ba u la thep ha ka minit kaba 33, 55 & 81, kumjuh u Dajiedlang Wanshong (10 & 29) ula thep ar kol bad ïa ka shi kol la thep da u Aibok Lawriniang (90+3). Na ka liang ka Tynring ka la pynphai shi kol da u Nelsonroy Mynsong (12).
Haba phai sha ka jingïaknieh lait hiar (Bottom League), ka Jongksha SC ka la pynliem noh ïa ka Lumshyiap SC da 8-1 kol. U Babiang Umsong u la khur ia ka hat-trick hadien ba u la thep ha ka minit kaba 30, 80 & 87. Katba ïa kiwei pat la thep da u Nangiar Kshiar (10), Bishar Nongspung (31), Fernando Malieh (38), Janbor Nongspung (64) bad u Ïaishah Kharsahnoh (79). Na ka liang ka Lumshyiap ka la pynphai shi kol da u Demanding Syngkli (25).
Ha ka lah sngi U Blei ka jingïalehkai quarter final kan long hapdeng ka Lawsohtun SC pyrshah ïa ka Smit SC ha ka por 3:15 nohphai sngi ha SSA Stadium, katba ha ka Bottom League ka Jongksha ïa ka Mawkriah ha ka por 1 baje mynsngi ha madan MFA.s
