Shillong, Nailur 07
Ka kynhun ïalehkai Under -17 boys jong ka O.M Roy Memorial Higher Secon-dary School na East Khasi Hills ka la long ba la pynkhreh ban leit shim bynta ha ka 65th Subroto Cup International Football Tournament 2026 ka ban long ha nongbah Delhi.
Kane ka long hadien 13 snem naduh ba kane ka kynhun kaba na Mawlai Kyntonmassar ka la rah ïa ka nam lahduh ha u snem 2013 ha ka kyrdan ïalehkai Under-17 jong ki shynrang.
Kane ka kynhun hapoh ka jingïalam u Paila Rem-dor Syndor (coach) kan mih na ka nongbah ha ka sngi Balang, katba ka jingïalehkai jong kane ka kyrdan kan sdang naduh 15 haduh 24 tarik mynta u bnai ha New Delhi.
Hashwa ba kane ka kynhun kan mih na ka nongbah Shillong, na ka liang ki bor pynïaid jong kane ka skul ki pynlong ka jingïalang kaba kyrpang ha ka lah sngi U Blei hapoh hall jong katei ka skul kaba don ha Mawlai Kyntonnassar.
Ha kane ka sngi la ïadon lang President ka Shillong Sports Associa-tion Bah Banteidor Lyng-doh, kumjuh u nongseng ïa ka E-Sports Bah James Syiemlieh, u Assistant Director ka tnat ïalehkai Bah Khroobok Passah, Bah Lekini Suting Foot-ball Coach, ka Principal Kong A. Syiemlieh, u Rangbah Dong jong ka Kyntonmassar Bah Ange-lus Biam, u President ka Mawpdang SC Bah Lait-phar Syiem, ki nongïalam ka Langsning Sports Club, ki dkhot ka managing committee jong ka skul, ki nonghikai, ki kmie ki kpa bad ki khynnah skul bad kiwei kiwei.
Haba ai jingkren ha kane ka sngi, u Bah Ban-teidor uba long ruh u President ka Shillong Sports Association bad uba long ruh u MLA ka Mawkynrew, u la ong ba ka OM Roy ka skul kaba la shim khia bha na ka bynta ban sei ïa ki nongïalehkai kiba paw ka Jylla khamtam ha ka phutbol. “Ngi khmih lynti ba kane kan dangïai bteng ym tang ha ka pule puthi, hynrei ha ka kam ïalehkai ba kan nanglah ban sei ïa ki nongïalehkai kiba kynsai.”
Kumba kane ka skul ka la rah teng ïa ka nam lahduh ha u snem 2013, u Bah Lyngdoh u la pynpaw ka jingkhmih lynti ba kan rah biang sa shisha ha kane ka kynti kaba mynta. “Te kumta nga ai khublei kitbok ïa phi baroh ki khynnah ba phin ïalehkai bha ha katei ka lympung. Lada phi rung sha ka phainal, nga kular ba ngan wan sakhi da la ki jong ki khmat bad ban ai mynsiem ïa kane ka kynhun khnang ba kan rah ïa ka nam lahduh,” u la bynrap.
Ha kawei pat ka liang u President ka Mawpdang SC u Bah Laitphar Syiem u la pynpaw ba kine ki khynnah ym tang ba ki ïalehkai ha ka Inter School Subroto Cup, hynrei ki la mihkhmat ruh ïa ka Mawpdang, kaba la rah ïa ka nam lahduh ha ka U-20 4th Division Football League 2026 jong ka Shillong Sports Associa-tion da kaba pynliem ïa ka Seila Sap FCC da 2-0 kol ha ka phainal.
Kum ban shu pynkynmaw ka OM Roy ka la rah ïa ka nam lahduh ha ka State Level Inter School Subroto Cup hadien ba ka la jop ïa ka Wapung Higher Secondary School na East Jaiñtia Hills da 3-0 kol ha ka phainal.
