Dhaka, Nailur:
Ka Bangladesh ha ka Sngi U Blei, ka la pynpaw ba ka kwah ban pynthymmai bïang noh ïa ka jingïadei bad ka Indïa, bad ban tei bïang ïa ka jingïadei kaba thymmai hapdeng kitei ki arlïang mamla kaba lah ban wanrah jingmyntoi lang ïa baroh arlïang ri bad ka la pynkynmaw ruh ïa ka jingïadei hapdeng kine ki arlïang ri ha ki por ba dang long Myntri Rangbahduh ka Sheikh Hasina ha ki snem ba la leit.
Kane ka jingkren jong u Myntri kam bar ri, u Humaiun Kobir, ka long hadien ar sngi hadien ba ka Bangladesh ha ka Sngi Palei jong ka taïew ba la dep, ka la ong ba u Myntri Rangbahduh ka ri- u Tarique Rahman, un nym ïashim bynta ha ka BRICS Summit ba la pynlong da ka Indïa namar ba um shym la shah khot sha kane ka jingïalang, ha kaba ïa ka jingkhot ha ka jaka kata la pynïar sha u shuki jong ka BIMSTEC.
Ka BRICS Summit kaba ar sngi ka la kut ha ka Sngi U Blei. Ka Indïa, ka la khot ïa U Rahman, ban ïadon bynta ha katei ka jingïalang, kum u chairman jong ka Bay of Bengal Initïative for Multi-Sectoral Technical and Economic Cooperation (BIMSTEC), katba ka jingkhot ba kyrpang jong ki arlïang mamla, ka la don naduh u bnai February.
Ka Bangladesh ka kwah ban “pynthymmai” ïa ka jingïadei jongka bad ka Indïa, ong u Kobir ha ki nongthoh khubor hangne.
“Ngi kwah ban ïaid sha ka jingïadei kaba thymmai, kaba dei ban leh lyngba ki jingïakren arlïang mamla, ym lyngba ka jingïalang kaba bun lïang,” u la ong.
Ka jingïadei hapdeng ka Indïa bad ka Bangladesh ka la khluit bha namar ka New Delhi ka la ai jaka rieh ïa ka Hasina, kaba la phet krad sha Indïa hadien ka jingshah weng shuki jong ka ha ka jingïakhih ba la ïalam da ki samla ha u Nailar 2024.
U Kobir u la ong ba ka Bangladesh ka donkam ban ïaid shakhmat na kaei kaba u la batai kum ka “jingkhuslai palat” ïa ka Indïa bad ban ïakynduh ïa ka jingïadei jong ka bad ka New Delhi ha ka rukom kaba ïahap, da kaba pynleit jingmut ha ki jingmyntoi lang bad khein ïa ka kum shi bynta jong ka jingïadei kaba kham jylliew bad kiwei pat ki ri.
