Srinagar, Nailur:
Ki la don kumba 2 ngut ki lehnoh kiba la shah siat ha ki shipai ha Jammu & Kashmir ha Udhampur distrik.
Ki heh sorkar ki la ïathuh ba hadien ba la ïoh jingtip ïa ka jingdon jong ki briew ba isuba sniew na Majalta jong ka distrik Udhampur ha ka janmiet jong ka sngi Balang, ki shipai ba ïatreilang ki la pynlong ïa ka jingker kut bad jingkhynra, hadien kane ka la don ka jingïakynduh bad ki lehnoh ha kaba ka la don ka jingïasiat kaba markylliang.
“Ha ka jingïasiat kaba la jia, arngut ki lehnoh ki la shah pynïap. Ka jingkhynra ka dang ïaid shakhmat ha katei ka jaka haduh ba la thoh ïa ka khubor. La pynthikna ïa ka jinglong thikna jong ki lehnoh kiba la shah pynïap,” la ong ki heh sorkar.
Ïa kane ka jingkhynra la sdang nyngkong da ki pulit ka J&K bad ki shipai ba la ïatreilang kyrpang jong ki shipai ka tnat Army. La pynpoi mar mar ïa ki bor pahara sha katei ka jaka ym slem hadien ba la sdang ka jingïasiat.
Ka kynhun shipai ka tnat Indian Army, ki pulit Central Reserve Police Force (CRPF) bad ka Special Operations Group (SOG) jong ki pulit ka Jammu & Kashmir ki la pynlong ïa ka jingleit khynra ha ka thaiñ.
Kane ka jingkhynra ka long hapdeng ka jingjur jong ki kam pahara ha ka thaiñ Pir Panjal hadien ka jingshah pynpra dang shen ïa kawei ka kynhun kaba la kynnoh ba ka dei ka OGW kaba ïadei bad ka Lashkar-e-Taiba (LeT) ha Rajouri.
Ha ka 15 tarik Nailur, ki pulit ka Rajouri ki la kem ïa lai ngut ki briew kiba ïadei bad ka kynhun lehnoh ba la kynnoh ba ka treikam ha ka thaiñ Pir Panjal. Kitei kiba la shah kynnoh, ki dei kiba la tip kyrteng kum u Zakir Hussain, u Mohd Azam, bad u Mohd Mushtaq.
Ki bor pahara ki la pynjur ïa ka jingkhynra da kaba pyndonkam da ki ksew smadien bad ki jingpeitngor na suiñ ban pynkhuid ïa ka jaka bad ban buddien ïa kino kino ki lehnoh kiba dang sah. Ka jingmaham kaba jur, ka jingpeit bniah ïa ki kali, bad ki jingker ba pyrkhing bha ki dang sah ha kylleng ki lynti ba kongsan ha ka thaiñ Udhampur-Reasi.
Ki jaka lum jong ka Udhampur, Reasi, Ramban, Kathua, Poonch bad Rajouri distrik ki la don hapoh ka jingpeitngor ba kyrpang jong ki bor pahara namar ba la mih khubor ba ki don ki lehnoh ba shyrkhei jong ka Pakistan ha kitei ki jaka bym lah ban poi.
Katba kine ki kam pyrshah lehnoh ki la ïaid shakhmat la palat hynriew bnai, ki la don ki jingjop na ka bynta ki bor pahara, namar ba la pynduh jait ïa ki katto katne ki lehnoh ba pawnam ha kine ki kam.
Ka jingmyntoi kaba kham khraw jong kine ki jingleh ka long ba ki lehnoh ki shah pynsah beit ha ka jingphetwir khlem da lah ban ïuh kjat hangno hangno ruh ban thmu bad pynlong ïa ki jinghiar thma pyrshah ïa ki bor pahara, ki shipai, bad ki riew paidbah.
