Vijayawada, Nailur:
U Myntri ka tnat HRD, u Nara Lokesh u la ong ba man la kawei pa kawei ka longïing ha Mangalagiri yn pynbiang ïa ka umbam umdih, ka Gas hapoh khyndew bad ki jingpynïaid nala um hapoh khyndew shwa ka elekshon sha ka Ïing dorbar thawaiñ jong u snem 2029.
Haba kren sha ki paidbah hadien ba la dep ban sam ïa ka bynta kaba lai jong ka prokram ‘Mana Illu-Mana Lokesh’ (ki patta ïing) ha Kunchanapalli ha Tadepalli mandal jong ka Mangalagiri konstitwensi, ha kaba u la sam ïa ki patta ïing ba neh bad ki shithi ai jingbit PMAY sha ki 372 ngut ki nongïoh jingmyntoi, u Lokesh u la ong ba ka jingdawa jong ka Hospital kaba long 100 nongshong shnong, yn sa pyndep bad aiti sha ki paidbah hapoh lai bnai ba nyngkong jong u snem ban wan.
U la kular ruh ban weng ïa ki lad ki lynti kiba neh ïa ki jingeh ha ka um dih bad ki jingtuid um hapoh khyndew bad u la ong ba yn sa buh surok mardor hadien ba la dep ïa ki kam pynpoi um hapoh khyndew.
Halor ki patta ïing, u la ong ba ka sorkar ka la sam 3,002 tylli ki patta ha ka bynta kaba nyngkong, 2,670 ha ka bynta kaba ar bad 388 ha ka bynta kaba lai.
Ryngkat, kine ki nongïoh jingmyntoi ki la ïoh ïa ka hok ba neh halor ki mar ki mata kiba shongdor T.2,000 klur, u la ong.
U Lokesh u la ong ba ka jingthmu ba la sdang ha Mangalagiri ka la long ka nuksa na ka bynta ka Jylla.
Ka sorkar dang shen ka la sam 29 hajar tylli ki patta ha Visakhapatnam bad shen kan sa ai sa 24 hajar tylli ha Vijayawada, u la ong.
Haba pynkynmaw ïa ka jingshah rem ha ka elekshon sha ka ïingdorbar thawaiñ jong u snem 2019 da 5,300 vote, u Lokesh u la ong ba u la wanphai biang sha Mangalagiri hadien ba u la trei 5 snem bad u la jop ïa ka elekshon 2024 da ka jingbun paid kaba 92,000 vote.
“Ka jingbun paid kaba phi la ai ha nga ka la pynjur ïa ka jingkitkhlieh jong nga”, u la ong.
U la ong ba la pynwandur ïa ka skul sorkar Nidamarru kum ka Model Institution bad u la kam ba ka jingdawa jaka shong ha ki skul sorkar ka la sdang ban mih ha Mangalagiri.
Ka sorkar ka dang trei ban pyni nuksa ïa kane ka rukom ha kylleng ka jylla, u la ong.
U Lokesh u la kdew ruh ïa ki kam pynroi ba kynthup ïa ka jingpynheh ïa ka temple Lakshmi Narasimha Swamy, ka jingshna ïa ki park, ki Community Hall bad ki surok, ka jingplie biang ïa ki Anna canteen, ka jingbuh ïa ki jaka pynmih um dih bad ka jingpynroi ïa ki jaka leh niam bad jaka thang met ïap.
Haba kyrpad ïa ki nongthep vote ban kyrshan ïa ki kyrtong synrop ha ka elekshon Local Body ban wan, u la ong ba um shym la ai bun ki jingkular hynrei un pyndep ïa kiba u la ai.
