Tennessee, Risaw:
Ka jylla Tennessee, ka la rai pyniap ïa ka Christa Gail Pike, kaba 50 snem ka rta, da kaba ai ïa ka dawai tika pyniap briew ha Riverbend Maximum Security Institution ha Nashville, ha ka Sngi Balang, ha kaba kan long ka sien pyniap kaba nyngkong jong katei ka Jylla, ïa ka briew lane ïa ka kynthei, hadien palat 200 snem ba khlem shym la leh shuh kumta. Ka Pike ka dang don 18 snem ha ka por ba ka la shah rai pynrem halor ka jingpyniap jongka ha u snem 1995 ïa ka Colleen Slemmer, kaba dang 19 snem ka rta, kaba dei ka para samla pule ha kawei ka jaka ai jinghikai Job Corps ha Knoxville. Kane ka mukotduma ka la khring ïa ka jingpyrkhat jong ka ri hadien ba ka pentagram ba la ker ha ka met jong u nongshah pynïap ka la pynmih ïa ka jingtieng kaba ïadei bad ka juk kaba la khot ka “jingtieng soitan”.
Ka ïingbishar ba ha khlieh duh jong ka US ha ka Sngi Ba-ar ka la kyntait ïa ka jingkyrpad jong ka Pike ban pynsangeh noh ïa ka jingpynïap, katba u Lat ka jylla u Bill Lee u la kyntait ïa ka jingkyrpad mane jong ka shisngi mynshwa.
“Nga dei ka khynnah kaba pang jingmut jingpyrkhat kaba dang 18 snem ka rta. Ka la shim por ïa nga bun snem ban sngewthuh wat ïa ka jingkhia jong kaei kaba nga la leh,” la ong ka Pike ha ka kyrwoh kaba la kynthup ha ka jingkyrpad map jong ka. “Khamtam shuh shuh ban pdiang katno tylli ki jingim nga la ktah. Nga la shim ïa ka jingim jong u khun, ka para bad ka paralok jong uwei pat. Ka pynpang ïa nga mynta ban pyrkhat ba nga lah ban leh ïa kum kane ka kam runar.”
Ka kmie jong u Slemmer ka kwah ba ka jingpyniap kan iaid shakhmat, da kaba ong ba ka la ap da ki phew snem ban iohi ba yn pyndep ïa ka jingpynshitom ïa u Pike.
“Man ka por ba nga pyrkhat ïa kane, nga pyrkhat ïa ka Colleen kaba sngew ïa kata ka jingshitom bad kaba pyrshang ban khie bad ban mareh”, la ong ka May Martinez ha ka jingiakren lyngba ka telephone.
Ka Martinez ka la ong ba kawei ka kynhun ka la iarap ban lum pisa khnang ba ma ka bad u tnga jong ka kin lah ban leit na Florida ban sakhi ïa katei ka jingshah pyniap.
Katei ka jingshah pyniap, ka la pynkyndit ïa ka nongbah Knoxville ha u snem 1995. Ki nongmudui, ki iathuh ba ka Pike, ka la pyniap ïa ka Slemmer, ha ka 12tarik u Kyllalyngkot, 1995, da kaba ngeit ba ka thmu ban shim ïa u samla jong ka.
