Morocco, Nailur:
U syiem jong ka Morocco ha ka Sngi Ba-ar, u la pynbna kyrteng ïa ka nongialam jong ka ka Marrakesh, ka Fatima Ezzahra El Mansouri, kum ka Myntri Rangbahduh kynthei ba nyngkong jong ka ri, ong ka kynhun myntri syiem, hadien ba ka seng jongu, ka la jop ïa ka ilekshon parliament ha ka taiew ba ladep.
Ka seng trai jongka, ka Authenticity and Modernity Party (PAM), ka la jop ïa ka jingthep vote, da kaba jop 97 na ki 395 tylli ki seat ha ka ïing dorbar thawaiñ – 31 tylli tam ban ïa ka nongïalehkai ba jan tam kaba bud, watla ka jingthep vote, ka la long kaba duna tam ha kine ki arphew snem.
Ka kynhun Myntri syiem ka la ong ba u Syiem Mohammed VI mynta u la aiti ïa katei ka nongialam ba 50 snem ka rta, kaba la shakri ruh kum ka Myntri ka tnat kam poh ïing, ban “thaw ïa ka sorkar thymmai”.
Haba kren tang hadien katto katne por, ka El Mansouri ka la ong ba ha ka jingkren ha ka telebishon, ka jingthung kam jongka, ka long kaba shisha.
“Ha ka sien kaba nyngkong ha ka histori jong ka ri jong ngi, ka kynthei ka shim ïa ka jingkitkhlieh ban ialam ïa ka sorkar,” ka la ong. “Kane ka long ka jingsngew sarong ym tang ïa nga hynrei ïa baroh ki kynthei ha Morocco.”
Khlem ka jingbun paid kaba pura, ka PAM kan hap ban thaw ïa ka jingïatreilang bad kiwei pat ki seng, watla u syiem u bat ïa ka bor kaba heh halor ki polisi kiba kongsan. Na ka bynta ka Myntri Rangbahduh ba thymmai, “ka kam ka sdang mynta ka sngi”, ka la ong.
“Ngin sdang shwa ïa ki jingiakren hapoh ka seng jong ngi shwa ban pynlong ïa ka jingiakren bad baroh ki kynhun sain pyrthei.”
Ka El Mansouri ka la pyniasoh ialade sha ka PAM ha u snem 2008, ha u snem ba la seng ïa ka da u nongai jingmut jong ka syiem ba mynta u Fouad Ali El Himma kum ka jingiakhun pyrshah ïa ka jingiakhih Islamist jong katei ka ri.
Ka dei ruh ka kynthei kaba nyngkong eh ban shakri kum ka nongmihkhmat jong ka Marrakesh, ha kaba ka la jop ïa katei ka kam ha u snem 2009 shwa ban duh noh ïa ka hadien hynriew snem, nangta ka la shimti biang ïa ka ha u snem 2021.
