PoK, Risaw:
Katkum ki khubor, la ong ba mu Myntri ka tnat ïada ri jong ka Pakistan, u la ong ba ka Pakistan kan shim da kino- kino ruh ki lad – ki lynti ban ïada ïa ka Saudi Arabia na ki kam thombor jong ki lehnoh Houthi ba la ai jingkyrshan da ka Iran, da kaba tyrwa ruh ïa kawei na ki dak kiba shai bha jong ka Pakistan haduh mynta ba ka lah ban donkti beit ha ka jingïakynad kaba nang jur ha kane ka thaiñ.
U Khawaja Muhammad Asif, myntri kam pohiing, ula kyntait ban ong, la ki shipai jong ka Pakistan, ki la dep ban iashim bynta ne em ha ki jing thombor liengsuin. U la ong, wat la katta ruh, ba ka bor shipai jong ka Pakistan kan long kaba lah ban ioh da ka Saudi Arabia hapoh ka jingiateh ba thymmai ban iada mar kylliang bad ka Saudi Arabia bad ka Turkey.
“Ngam shym la leit sha ki jingtip ba bniah, hynrei kaba shai ka long ba haba nga ong ba ngi shah teh ha kane ka jingpynbeit ban ïada ïa ka Saudi Arabia, kata ka mut ba kino kino ki lad ki lynti kiba don ha ka jingpyndonkam jong ngi, kin long kiba lah ban ïoh ïa ka Saudi Arabia ruh. Ki nongpyntreikam jong ka Iran ha Yemen.
Ka jubab jong u kam shym la pyntikna shai ïa ka jingiashim bynta jong ka Pakistan ha kino kino ki jingiakhih. Um shym la ong ruh la ka Saudi Arabia kaba la shah thombor bunsien ha ki Houthi ha kine ki taiew ba la dep, ka la pan jingiarap ne em.
Kane ka jingkren jong u ka long katto katne sngi hadien ba ki heh shipai jong ka Pakistan, Turkey bad Saudi Arabia ki la ïakynduh ha Riyadh ban ïakren halor ki rukom jubab halor ki jingshah thombor jong ki Houthi.
U Asif u la ong ba ki Houthi ki la pynjur ïa ka jinghiar thma da ki namding bad ki drone ïa ka Saudi Arabia bad pyniar ïa ka jingsynshar jong ki ha ki rud duriaw Red Sea jong ka Yemen.
Dang shen ki Houthi ki la ioh ban knieh ïa ka nongbah kad lieng ba kongsan jong ka Mokha bad katto katne ki dewlynnong jong ka Duriaw Basaw, da kaba pynjlan ïa ka jingpoi jong ki sha ka Bab el-Mandeb Strait, ka lynti iaid duriaw ha kaba kumba 12% na ka khaii pateng ha ka pyrthei ka iaid lyngba. Kitei ryngkat bad ki kynhun lehnoh ba ïatreilang ha Iraq, ki la hiar thma ruh ïa ki jaka pynmih umphniang jong ka Saudi bad ki la wad ban khanglad ïa ki lieng kit umphniang jong ka Saudi ban pyndonkam ïa katei ka duriaw.
U Asif u la batai ïa ki Houthi kum ki nongleh donbor bad ong ba ka jingshimkhia jong ka Pakistan ïa ka Saudi Arabia ka long kaba khlem artatien.
“Uno uno u nongshun jong ka Saudi Arabia u dei u nongshun jong ka Pakistan. Kata ka dei ban long kaba shai bha,” u la ong.
Ka Saudi Arabia, Pakistan, bad Turkey ki la ïa soi ïa ka Mecca Joint Defence Agreement ha ka 7 tarik u Nailar, ha kaba la pynbna ba ka jinghiar thma ïa uwei u dkhot yn niew kum ka jinghiar thma ïa baroh lai ngut. Ki ri ki la batai ïa katei ka jingiateh kum ka jingiada bad ki la ong ba kam dei kaba la thmu pyrshah ïa kano kano ka jylla.
Kane ka jingiateh ka wanrah lang ïa ka Saudi Arabia kaba riewspah ha ka umphniang, ka Turkey kaba don ha ka NATO bad ka Pakistan kaba don ïa ki tiar nuclear. U Asif um shym la kdew ïa ki tiar nuclear lane ban ai jingmut ba ki dei shi bynta jong ka jingkular jong ka Pakistan ïa ka Saudi Arabia.
Ka jingialeh hapdeng ka Saudi Arabia bad ki Houthi ka la thaw ïa ka jingtynjuh kaba kloi ïa katei ka jingiateh lok. Ia ka jingthoh ba pura jong ka pact ym pat pynmih, bad ki rukom synshar bad ki rukom treikam jong ka ki dang iaid shakhmat. U Asif u la ong ba ki lai tylli ki ri ki dang thaw ïa ka secretariat bad buh ïa ka rukom treikam jong ka jingiateh lok ha ka jaka jong ka.
