Baghdad, Nailur:
Ki shipai Islamic Revolutionary Guard Corps jong ka Iran, ha kane ka sien, ki la kyntu jur ïa ki nong America ba kin jied noh ïa ki paralok jong U President jong ka US, Donald Trump, ha ka Congress, namar ba ki shipai jong ka US, ki dei ban mih noh na ki ktem jongki, kiba dang sah ha ka ri ba marjan jong ka Iraq, ha ka Sngi Balang, ha ka jingrakhe jong ka Iran.
Ha kajuh ka por, ka Qatar ka la bteng ban kyntiew ïa ka shuttle diplomacy jong ka kaba thmu ban pynkut noh ïa ka thma kaba la neh hynriew bnai hapdeng ka Iran bad ka America. U Trump sa shisien u la iathuh lypa ïa ka jingaiti stet jong ka Iran.
Katei ka shithi kaba 26 sla, kaba la thoh da ki Guards, kaba la pynmih ha ka Sngi Ba-ar, ka kyntu ïa ki nong America, ba kin pyndonkam ïa ka bor sain pyrthei jong ki, ban weng noh ïa ki nongialam ba mynta, na ka kam bad ban kyntait ïa ka jingkyrshan jong ka US, ïa ka Israel bad ka jing tuklar jong ki shipai sha bar ri.
Katba katei ka jingthoh kam shym la lah ban pynkhih ïa ki nongthep vote jong ka US kiba lah ban nym ïohi wat ïa ka jingthoh ba la pynmih da ki lad pathai khubor jong ka Iran, hynrei ka pynpaw ïa ki mat kiba ki nongpeit bniah saiñ hima sima jong ka US ki ong ba ki treikam pyrshah ïa u Trump bad ka seng Republican ha shwa ka ilekshon sha ka 3 tarik u Nailur, ha kaba ki Democrats kiba pyrshah ki lah ban shim biang ïa ka jingsynshar halor kawei ne baroh ar tylli ki kamra thaw aiñ jong u Trump.
U Trump u la ïalap ilekshon ha u snem 2024 da kaba kular ban kiar na ki thma ba thymmai, ban pynkut noh ïa ki jingïakynad kiba la don lypa bad ban pynhiar ïa ka jingkiew dor, hynrei ka thma bad ka Iran, kaba u Trump u la sdang ryngkat bad ka Israel, ka la ïarap ban pynkiew dor ïa ka umphniang ha ka pyrthei bad saphriang ruh ha ka Middle East.
Ka jingwad bniah jong ka Reuters/Ipsos kaba la pynmih ha ka 21 tarik u Nailur ka la lap ba tang 17% na ki nongkynthoh ki mynjur ïa ka rukom pynïaid jong u Trump ïa ka jinglut jingsep – ka mat kaba hakhmat eh kaba ki nong America ki ong ba kan pynbeit ïa ka rukom thep vote jong ki ha u bnai Nohprah. Tang 34% ki mynjur ïa ki jingshah thombor ha ka Iran.
U Trump, uba la pynkheiñ ïa ka rukom niam jong ka Republican, ha u snem 2016, haba ula khot ïa ka jinghiar thma jong ka US ïa ka Iraq, kum ka jingbakla kaba khraw, ula ailad ïa ka jingmih noh kaba khatduh na Iraq, ha ka sngi thohdieng, kaba la mynjur ha u snem 2024, da u President barim jong ka Ri, U Joe Biden.
Kane ka jingweng noh ka long hadien 23 snem ba ki shipai ba la ïalam da ka US ki la pynkhyllem ïa u Saddam Hussein, nangta ki la pynmih ïa ka jingkulmar kaba la poi sha kaba kut ha ka jingmih jong ka Islamic State.
