Singapore, Risaw:
Namar ba hiar palat ka jingkha khun hapoh ka ri, la ong ba ki bor pyniaid ka Singapore ha kane ka sien, ki la wanrah ïa ka app ba kyrpang ban pyn ïakynduh paralok na ka bynta ki nongtrei sorkar jongka, kaba pynshlur ïa ki ban ïakynduh bad kyrmen ba kin ïoh khun shuh shuh. Ia kane ka FirstDate app la pynmih kum ka jingpyrshang mynta u bnai bad mynta la lah ban pyndonkam tang da ki heh sorkar jong ka Singapore. Ki nongpyndonkam ïa ka app ki dei ban jubab ïa ki jingkylli kiba bun shaphang ki jingsngewtynnad bad ki jinglong jong ki namar ba ka algorithm ka pyndonkam ïa ki jingtip ban pyniadei ïa ki marwei, kawei ka tarik ha kawei ka por.
Kane ka app ban ïakynduh paralok ka dei tang na ka bynta kito kiba don ha ka rta kaba 21 haduh 35 snem, ha kaba ka rukom treikam jongka kaba la jop ruh ïa ka khusnam Nobel, bad kane ka app ka ialeh ban pynkut noh ïa ka jingtlot jong ka ‘Swipe’ bad ban ïarap ïa ki nongpyndonkam ban tei ïa ka jingïadei kaba tikna, ong ka khubor ha ka BBC. Ha ka website jong ka, ka FirstDate ka pynpaw ïa ka rukom shongkurim kaba skhem jong ka Gale-Shapley kaba ai bor ïa ka prokram.
Shisien ba la pyniapoikha ïa ki arngut, ki don lai sngi ban pdiang ïa ka tarik. Ka app ka ai ruh ïa ki jingmut ban pynpra ïa ka jingeh, kaba ka khot ‘ki jingwad tarik’.
“Ha kaba kut jong ka sngi, nga pyrkhat ba ka jingïakynduh ïano ïano lyngba ka aplikeshon kam ju kylla than ha kylleng ki [jait aplikeshon bapher bapher],” la ong ka Elizabeth, ka nongtrei jong ka tnat ïada ri kaba 29 snem ka rta, ha ka jingpynmih khubor.
