Botswana, Risaw:
Ka Botswana ka la mad ïa ka jingshah kynthoh na ki nongïakhih ïa ka hok jong ki mrad hadien ba ki bor synshar ki la ai bor ban pynïap ïa ki 23 tylli ki Hati ban pynïoh doh na ka bynta ka jingrakhe ïa ka jinglaitluid kaba 60 snem jong ka ri. Ka ri jong ka thain shatei lam mihngi jong ka Africa, kaba don ïa ki hati kiba bun tam ha ka pyrthei, ka rakhe ïa ka jingdap 60 snem jong ka jinglaitluid na ka ri Bilat, da ki jingrakhe ha kylleng ka ri.
Katkum ka khubor jong ka BBC, ka laisen ba la ai da ka tnat jong ka mariang bad ka jngohkai pyrthei jong ka Botswana ka ailad ban khwai 23 tylli ki hati bad kiwei kiwei ki mrad khlaw na ka bynta kaei kaba ki bor synshar ki batai kum ki “jingthmu ba kyrpang”.
Kane ka rai ka la pynmih ïa ka jingsngewkhia hapdeng ki kynhun kiba iada ïa ki mrad khlaw. U Oaitse Nawa, u Chairman jong ka Elephant Protection Society kaba don ha Botswana, u iathuh ha ka BBC, ba ki Hati, ki donkam ïa ka jingiada kaba kham khraw.
U la maham ba ka jingpyndonkam ïa ki hati na ka bynta ki jingkhawai lehkmen ka lah ban phah ïa ka khubor kaba bakla shaphang ka jingiada ïa ki mrad khlaw bad ka lah ban pynshlur ïa ka jingshah pyniap mrad da kaba pynlong ïa ka jingpyniap ïa ki hati ban paw kum kaba lah ban pdiang haba la mynjur da ka sorkar.
“Ki hati ki la duh noh ïa ka shongsuk- shongsaiñ jongki namar ba ki ju shah pynher krad na kawei ka jaka sha kawei pat ka jaka, da ki jingsiat suloi jong ki riew shim kabu,” la ong u Nawa.
Ki tyllong khubor ki iathuh ruh ba ki don ki briew ha Botswana kiba la pynpaw ïa ka jingsngewkhia halor ka jingbam ïa ka doh mrad ha ka por ba la pur ka jingpang kjat bad ka shyntur. Ki bor synshar ki la wanrah ïa ki lad ki lynti ban tehlakam ïa ka jingsaphriang jong kane ka jingpang.
U Tshenatshe Monwela uba dei u rangbah na Maun u la ong ba ïa ka shnong jong u la dei ban ai masi ha ka jaka jong ki. U la kynthoh ba ki hati ki don ka dor kaba kongsan ha ka kolshor bad ka mariang bad u la ong ba la dei ban pyrkhat bha ïa ka rekod jong ka Botswana ban ïada ïa ki mrad khlaw haba rai ïa kino ki mrad ban pyndonkam na ka bynta ki jingrakhe.
