Georgia, Risaw:
Katkum ki khubor la ong ba katei ka samla pule jong ka University ha ka nongbah Georgia, kaba la don 21 snem ka rta, ka dang don hapoh ka jingsumar ha ka jaka thiah sumar ba kyrpang (Intensive Care Unit), hadien ba ka la hap na ka jingkhang ïit jong ka mala kaba 8 jong ka jaka sah kaba don shabar jong ka skulbah ha Athens ha Georgia. Ka Kristin Sargent, kaba dei ka samla pule kaba la kham shemphang ha ka laiñ ‘Finance and Marketing’ ha katei ka skulbah, bad la ong ba ka la shu thaw lait na ka iap hadien ba ka la hap na katei ka jinghap ba shyrkhei naduh ka mala kaba 8 jong katei ka jaka sah jongka.
Katkum ka kaiphod jong ka tnat pulit jong ka Athens-Clarke County kaba la ioh da ka PEOPLE, la pyntip bad khot jingïarap ïa ki ophisar sha ka Rambler Athens Apartment Complex kaba don ha West Broad Street ha ka por kumba 7:30 baje janmiet ha ka sngi Saitjain, ka 26 tarik u Nailur, hadien ba ki la ioh ïa ka kaiphod ba uwei u samla pule u la hap na ka jingkhang lane ka jingkhang.
Ki nongïarap ba nyngkong ki la lap ïa ka Sargent ha madan hajan ka jngi kai jong katei ka jaka sah briew. Ki pulit ki la iathuh ba ka la paw ba ka la ioh kum tyngkhuh ïa ka ben nar ha ka por ba ka hap. La iathuh ba kawei ka kushion kaba don ha katei ka ben, ka la bit da ka snam suda.
U kpa jong ka, u Richard Sargent, u iathuh ba ka khun jong u, ka la don ïa katto- katne ki jingmynsaw kiba jur bha hynrei u la ong ba katei ka longiing, ka long kaba donbok, ba ka la lait na ka iap ha katei ka jingjia ba sniewbok jong ka.
U Richard u la ong ruh ba katei ka jingjia, ka la jia hadien ba ka kynhun ïalehkai phutbol jong ka skulbah Georgia ka la pynliem ïa ka Oklahoma Sooners da 41-13 ha ka Sngi Saitjaiñ, kaba pyni ba ka jingrakhe hadien ka jingïalehkai ka lah ban don bynta ha ka jingkmen ha katei ka apartment complex. “Nga tip shai ba ki don shibun ki khynnah hangne kiba dang 21 snem ka rta kiba la sngewkmen haduh katta katta,” la ong u Richard.
