Washington, Risaw:
Ka US ka la rai ban pynkiew ïa ka bai lutksan lane ka khajna naka bynta ki nongwan buhai shnong kiba kwah ban bei tyngka ha America bad ha kaba kut kin dawa ïa ka jinglong trai shnong ba pura hapoh ka prokram bei tyngka EB-5 kaba dang long kawei na ki lad ba lah ban shaniah bha na ka bynta ki nongseng kam seng jam bad ki longing longsem na India ban ioh ïa ka Green Card.
Ka tnat treikam jong ka US, ka la pynkut noh ïa ka kyndon, ha ka sngi Balang, kaba wad ban pynkiew palat ar shah ïa ka bai lutksan, na ka bynta ban aplai ïa ka visa EB-5. Kane ka kyndon kan treikam naduh ka 30 tarik u Naiwieng.
Ka US EB-5 Prokram jong ki nongbei tyngka nabar ri ka ai ïa ka jingsah ba pura (ka Green Card) ïa ki nongbei tyngka nabar ri bad ki bahaiing ba jan jong ki kiba bei tyngka ha ka kam khaii jong ka US bad thaw 10 tylli ki kam ba pura na ka bynta ki nongtrei nong America.
Ka bai thep ïa ka Form I-526, kaba pyndonkam da ki nongbei tyngka ba ieng, kan kiew na ka USD 3,675 sha ka USD 7,615.
Ka bai lutksan na ka bynta ka jingujor ba nyngkong jong ka phorm I-526E, ba la pyndonkam da ki nongbei tyngka kiba ïashim bynta lyngba ka jaka pdeng jong ka thaiñ ba la mynjur, kan kiew na ka USD 3,675 sha ka USD 7,850.
Ki dorkhas ba nyngkong jong ka I-526 bad I-526E kin kynthup ruh ïa ka bai teknoloji kaba USD 75.
Ki nongbei tyngka kiba don ha ki thain pdeng ki dei ban siew shuh shuh ïa ka bai bei tyngka jong ka prokram.
Ka bai lutksan na ka bynta ka Form I-829, kaba la thep da ki nongbei tyngka kiba kwah ban weng ïa ki kyndon halor ka jinglong nongshong shnong ba pura jong ki, kan kiew na ka USD 3,750 sha ka USD 5,000.
Ki jingsiew ba la buh ha ki jaka pdeng jong ki thain kin kiew kham jur. Ka bai lutksan na ka bynta ka aplikeshon ba nyngkong jong ka Form I-956 kaba wad ïa ka jingpynbna kum ka pdeng jong ka thain kan kiew na ka 17,795 dollar sha ka 44,115 dollar.
Ka jingsiew na ka bynta ka Form I-956F, kaba pyndonkam ban pan jingmynjur ban bei tyngka ha ka kam khaii, kan kiew sha ka USD 42,675 na ka USD 17,795.
Ka bai lutksan shisnem na ka bynta ka Form I-956G kan hiar na ka USD 3,035 sha ka USD 2,165.
Ka kyndon ba khatduh ka buh ruh ïa ka phorm I-527 na ka bynta ki katto katne ki nongbei tyngka kiba wad ban pynkylla ïa ki jingthoh ba rim jong ka phorm I-526. Ka jingpynrung thymmai kan shongdor haduh USD 10,330.
Haba pynbna ïa ki bai lutksan kiba thymmai, ka USCIS ka la ong ha ka jingpynbna pathai khubor ba ïa ka tnat la bei tyngka shibun na ki bai lutksan kiba ka shim, ym na ki khajna.
“Kane ka mut ba ka jinglut ban bishar bniah ïa ki aplikeshon, ban pynlong ïa ki jingpeit bniah ïa ka tynrai, ban pynshisha ïa ka jinglong hok, ban lap ïa ki jingleh thok, bad ban pynneh ïa ki jingtreikam jong ka prokram dei ban siew da kito kiba pyndonkam ïa ka rukom rung briew,” ong ka jingpynbna.
Hynrei, kum kiwei pat ki jait jingwan buhai shnong kiba pynshong nongrim ha ka kam, ki visa EB-5 ki hap hapoh ki kyndon ba man la u snem bad ki kyndon jong ka ri.
